Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

صندوق عجب...شهوة صبية !!

souvenirs-boxMonia Messoussi - منية مسوسي

في نهار و الشتاء تصب سمعت صوت الزفارة... زفارة مولى الصندوق... صندوق العجب...

تلفت و خرجتلو... ناداتو وقالتلو وريني اش في صندوقك نعطيك اللي كتب... دار و قاللها يا صبية هاني هنا ربي يكتبلك الهناء... تمنى اش تحب ... هالصندوق بقدرة ربي يوريك العجب ...

غمضت عينيها و قالتلو

شاهية نعيش في زمان البي...

حطت عينها في الصندوق و شافت زمان الي كان الراجل سيدي و المرا للا ...

زمان اللي كيف تضحك العين من تحت الخامة يطيح المغبون ما في عينو بلة...

زمان السفساري و القلة ... واللي عمرو ما يبات جيعان اللي يقول يا كريم متاع الله...

رجعت للدنيا و قالتلو ...

يا مولى الصندوق مزال عندي ما نتمنى...

قاللها تمنى يا بنية و اعقد النية و انشالله صندوق العجب يوريك اللي تحب و راك ما تاكل كان اللي كتب...

غمضت عينيها و قالتلو...

زعمة حبيبي كيف إنو؟ شاهية نشوفو قدامي و نملى عيني منو...

بيني و بينو ثنايا نتمنى نشوفو بحذايا...

حطت عينها في الصندوق و شافت...

شافت روحها بين زناقي المدينة تلوج عليه في كل تركينة... في كل ثنيا يقوللها هاني هنا...

و في بلاصة شافتو ... خلطت عليه و حملتو ... و مالوحش حلفت لاهي مسيبتو...

قربت لوذنو و قالتلو... ايجا نحكيلك عاللي صاير بيني و بينك...

نحبك و نموت على قدك و الدنيا ما تسواش الضحكة على خدك...

شاهية نكون معاك و عيني ما تخطاك و نعدي عمري سترك و غطاك...

شاهية نهار ندوخ و يدورو في كفي مفتاح ذكر... نفيق و نعطي الكلام و بين كل كلمة و كلمة انادي بإسمك و ما عليا ملام...

شاهية نلبس روبة بالنوار... تشدني من يدي و نمشيو على حرف الشط... تخزرلي و تقلي محلاك كيف للحطة تحط...

شاهية قد ما نخزرلك عيني ما تشبعشي منك...

هي مزالت تتمنى و سارحة في سماها و مولى الصندوق ناداها ...

يا صبية الليل طاح... و الصباح رباح... غدوة نرجع لبنتي بعد ما نقول يا فتاح... ربي يزين سعدك و يعطيك اللي يخلي قلبك يرتاح...

حنتك في الاقدام و سعدك القدام ربي كبير و في يدو مفتاح الأحلام...

اسمعها مني نصيحة، المحبة ما تكتمهاش... و الضحكة ما تخبيهاش....

حب اللي يحبوك و ماتخافش ماللي ما يحبوك راهم لا يضروك و لا ينفعوك...

المحبة كنز... المحبة نعمة ربي على عبادو ما تخبيهاش راو بنادم بلا بيها ما يسواش...

بنتي يقوي سعدك و يعطيك ما تتمنى...

دعوة ما تشدها على حد راهو ربي يحب اللي يحب الخير و يدعي للغير....

الليلة وفات مع صندوق العجب غدوة انشالله نرجعلك

و تمنى اللي تحب...

بقلم منية مسوسي

صندوق عجب...شهوة صبية !!