أحمد الطريقي -  اقتباس من نصوص أمين قلح

شطر المية خمسين شطر الوجيعة هروب شطر الحساب ذنوب شطر ضحكة تنهيدة توجع الكبيدة شطر الكاس الفارغ ما يتراش و شطر الكلام يترا و ما يتقراش شطر الندمان ليعة و شطر الثيقة خديعة  شطر الخطوة نية و شطر النجاح ثنية شطر الحب بنية مڨدية متربية رباية زمنية شطر الكبر شيب و شطر الحرام عيب شطر الحلو مر شطر بشطر و انا قلبي و لا حجر و انا نضري فيك تكسر و الخاطر ما با يتجبر شطر الحلمة نوم و شطر الضحكة هموم شطر الضلام ڨمرة و نجوم

شطر المطرة غيوم  شطر النار رماد و انا قلبي عاش و ما مات عاش بين البينين و قرر باش يشوف شنو تكتب على الجبين عاش بين شفايفك و زنودك  بين عينيك و خدودك خدودك الي ترسمت عليهم ضحكة صفراوية لبنية مبلية بالبكاء و نواح علي مشاء و راح تبكي من وجيعة الاجراح نحبك تضحك و ما تبكيش من ضحكتك ريحت العنبر فاح من دموعك قلبك شاح و انا قلبي كساح كساح منك و عليك شبيني وحلت و تبلت بيك و ما نجمتش نسلم فيك  محسوب دوام الحال محال و انتي كثرت الدلال و الهبال و انا صبري طال و الساس الي تعمدت عليه مال و تقطعو بية الحبال...