Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

شيْ ما يأثِّرْ فيِّا

force-femme-determinationWahiba Marmouri - وهيبة مرموري

و إلِّي معَمْلَا علِيهُمْ خلَّاوْهَا بيَّا ..

آشْ يكَّملِّي هالثِنيَّة ..

مِيسَالشْ تو نشَمِّرْ علَى سوَاعيَّا ..

و نتوَكِّلْ و ناقِفْ على ساقَيَّا ..

لا يهمْنِّي في الي غدَرْنِي قُدَّامْ عِينَيّا ..

و لا فِي إلِّي حكَا بِيَّا ..

تو ناقِفْ كيمَا أيْ مرا طاحِتْ اما كانِتْ قوِّيَا ..

و الله لا نخَلِّي حدْ يِتْشَمِّتْ فيَّا ..

و الله لا نغطِّي سنيَّا و الضُحْكَةْ ديمَا علَى خُدَّيَّا ..

أنا مرَا ما يهِّمْنِي في إلِّي خلَّاهَا بيِّا ..

عنْدِي مُخِّي و ضُحْكتِي و ثقْتِي كبِيرَةْ فيِّا ..

خلِّيهُمْ يكُونُو حجَرْ و حفُرْ هالثِنيَّة ..

و أنا نورِّيهُمْ إلِّي شيْ ما يأثِّرْ فيِّا ..

و إلِّي أنا عنْدِي ربِّي ساكِنْ بِينْ جْوَاجَيَّا ..

لا فِيهُمْ شكُونْ ينَجِّمْ يرُصْنِي و لا شكُونْ يقُصْلِّي جَوَانَحْ يدَيَّا ..

ما نعَمِّلْ علَى حدْ حتَّى كانْ هُمَا يعَمْلُو علِّيَّا ..

تربِّيتْ إلِّي في يدِّي مِشْ ليَّا ..

خاصَّةْ عالعزَازْ علِّيَّا ..

تِي حتَّا كانْ سْتغلُّونِّي نعْمِلْ رُوحِي مغمْضَّةْ عِينَيَّا ..

مانِيشْ لاعْبِتْهَا ضحِيَّةْ ..

خاطِرْ وقْتِلِّي الكَاسْ يفيضْ و ماعَادِشْ فيَّا ..

ننْفُضْ يدَّيَّا حتَّى و لوْ كانِتْ إلِّي جابِتْنِي للدِنْيَا هذِيَّا ..

عَادِي خلِّي يقُولُو يهُوديَّة ..

أمَا أنا بنيَّة ..

و مرَا ما يمَشِّي حدْ كِلْمتُو علِّيَّا ..

هذِيكَا هِي الحكَايةْ و كُلْ القضِيَّةْ !!

بقلم وهيبة مرموري

شيْ ما يأثِّرْ فيِّا