Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

شعفة و توبة

femme-abandonneeSouha Kouki - سهى الكوكي


ساعات نقعد وحدي نسرح و عالماضي نتحسر هكا ساعة على ساعة نتذكر كيفاش كنا كي زوز صغار نتعاركو اما غارقين في الحب ليل و نهار، كي نتفكر اياماتنا عينية تدمع، نحس قلبي تمعس و هو الي عليه عفس... غمة في قلبي و غصة في صدري...

و بهذاكا الكل توحشتو اي توحشتو، توحشت عينيه كي تلمع توحشت فمّو كي يتحرك توحشت يديه خشمو و سنيه... توحشت كل حاجة فيه بعد ما نتذكر هذا الكل نحس بالخنقة كايني محصورة في زنقة....

تعرف كيفاش تكون ميت و انت تتنفس؟ تحب تعيط تصيح اما مخنوق و قلبك مفلوق، و مخك مقلوب، ما عينك في شيء تلوج عالنوم و كلك مهموم و الا تسهر تفكر و فؤادك مكسر... تتكلم ما يسمعك حد، تمشي وحدك في الظلمة في طريق بلاش رفيق ، فادد، مغموم، ممروج و مهموم

.... شعور مايتصفش وحدك تحسو كان تلقى قلبك بيدك تمعسو كي ضلوعك على صدرك تتشد و جهدك يتهد...تتخنق و تفد تولي تبكي الغصّة و نفسك يتقطع بعد ما مخك التالي رجع... نندم على النهار الي عرفتو فيه و حبيتو فيه و مع هذا الكل توحشتو و نحب ننسى اما كيفاش؟ كيفاش تنسى قلب في قلبك عاش؟ تنسى ضحكة تنسى ممعة و بسمة مشات معاها الهمة ما لقيتش حل، نسي في روحي و نحاول نداوي جروحي... و السقف هذا ماعادش ندخل تحتو موش كي يقعد في الدنيا وحدو, شعفة و توبة يا محبوبة

بقلم تونسية متمردة
سهى الكوكي
شعفة و توبة