شبيك؟
Marwa Jabou - مروى جبو
محلاهم هاك الأيامات.. محلاهم هاك العوينات كي كنت تراني بيهم للّة البنات.. كي كنت تسهر اللّيل تخيّطلي من الكلام روب حرير وتعيّشني شهرزاد ملّي تغيب الشمس للفجورات.. كنت بيك وأنا فايقة نعيش حلمات، وأنا بلا جوانح نطير في السماوات..
كنت بكلامك نحمّر ونكحّل وبدلالك نمشط شعري وبخزراتك نلبّس روحي كسوة وتاج ونرا روحي مولات الزيّن والعين.. وسكّنت روحي في قلبك وقلت بحبّك ما نكبرش ونعيش طول السّنين بنت العشرين..
إنت تعرف، تعرف يا ولد الناس إلّي قلبي كان خالي وما كان الحبّ على بالي.. تعرف إلّي كي قتلي نحبّك وتحبّني قتلك أخطاني، الحبّ وجيعة ومخدّة مبلولة مليانة أسرار.. قتلي يا للّة البنات قلبك عندي في القطن نخبّيه، قلبك عندي من همّ الدنيا نحميه، حبّني يا عصفورة وايجا نبنيو في السّماء عشيّش ونعيشو الفوق ونصنعلك من قطرات النّدى فوق السّحاب شَرْكَة تزيّن بيها رقبتك الضوّاية ونوشوشلك وإنت في شوني ألف حكاية ورواية..
وهاني حبّيتك.. وينو إلّي بيه وعدت؟ وينهم الأحلام؟ وينو الكلام، وينو الحبّ؟ ياخي حبّي ليك إلّي فيّا تولد، فيك قتل الحبّ؟ ولا انتوما الرّجال هكّا، تبنيو للمرا قصور في السّماء وكي قلبها يجي بين ايديكم، قصوركم تتهدّم وكلامكم يتبخّر ولهفتكم تبهت وناركم تتثلّج؟
ما فهمتش.. أنا هي أنا، ما تبدلّتش. أنا إلّي كنت تكتب فيّا أشعار وتحكي عليّا كي المهبول طول النّهار وفي اللّيل توصفني للنّجوم والأقمار.. أنا إلّي كنت كي نغيب عليك، تقعد اتذبذب قدّام الدّار، وتحلف بإسمي وتضيع في ريحتي وكي تراني ترجع فيك الرّوح وتطفالك الأجمار..
شبيك؟ ريح حبّي في عوض تزيد تهيّج حبّك، طفات اللّهفة إلي عندك؟ ولا تعنيقتي وحلاوة ريقي ماعادش يبربشو قلبك؟ تحب تجرب الجديد ولا أنا ماعادش نعنعيك؟ شبيه صيفك ولّى شتاء وحرارة ايديك ولّات ماء؟ ماعادش أنا للّات النّساء؟
العيب فيّا ولا فيك يا ولد النّاس؟ أنا إلّي صدّقتك وحبّيت.. ولّا إنت إلّي ما صدّقت انّي حبّيتك، خمدت النّار إلّي في جواجيك؟...
صوت أنثى..
لا أكثر، لا أقّل
مروى جبو
Website Design Brisbane