سيرين الصغيرة، جارتي التي إنتحرت . وين مشيت وخليت أمك وحدها .. كيفاه ما فكرتش فيها .. سألت روحك شنوا مش يصير فيها بعدك .. خممت وقت تراك مشنوقة شنيا الحالة لي مش تكون فيها أمك..

تعرف توا لي هي قالت دار ما فيهاش سيرين ما ندخلهاش، تعرف لي قالت كان متت بعدها حطونا في قبر واحد، تعرف لي هي تجلطت بعدك.! قاعدة تسمع فيها توا شنوا تقول"سيرين ماتت، سيرين مشات، سيرين قتلوها" ..

إسمع سيرين شنوا تقول امك توا "سهرت انا وياها ليلة من ليالي الصيف الطويلة وقتلها ربي يعيشني ونراك تخرج عروسة من دار بوك بالروبة البيضة والتالون لي شريتهولك انا تتذكر سيرين ولا هاك حققتلي لي تمنيتو خرجوك ملفوفة في كفن ابيض وحطوك في بقعة ظلمة وانا م معاك،سيرين تذكر حكيتلك كان متت انا قبلك كون إنت ام خواتك، سيرين مش كنت نقولك إنت اختي وإنت صاحبتي علاش خليتني ومشيت،

كيفاه نخليك وحدك في بقعة ما تعرفهاش إنت بنتي كيفاااه عملت هكا! كيفاه خليتني! على خاطر شكون مش نعيش بعدك؟؟ تكلم شبيك ساكتة ما نعرفكش هكا انا ماماتك ما تخافش مني احكيلي عيش بنتي، ما تسكتش، ما تهبطش راسك، لا لا إنت ما عملت شئ، نعرف بنتي ونعرف شنوا جبت وربيت.. إيه وريني آك الضحكة لي تملالي نهاري رغم تعبي وهمي لي نقاسي فيه،إيه آك الضحكة لي تضحكها في ةجه لي تعرفو ولي ما تعرفوش، إنت سيرين المشرهة سيرين الضحاكة، سيرين الفذلاكة، إي نحبك ديما هكاكا حتى انا بعيد ابقى ديما اضحك عيش بنتي انا ما عادش نطول ونجيك وما نخليكش وحدك،

اي اي انا امك عمريش خليتك ماو تعرفني مدللتك وهزتك على كفوف الراحة موش شنجي اليوم ونخليك وحدك.. يا سيرين ترا في صحابك ولا! بكلهم يبكيو عليك، بكلهم قلبهم دم عليك، بكلهم توجعو عليك...

سيرين قلي توا انا شنوا مش نعمل نهار عيد ميلادك، نهار لي نتذكر فيه كيفاه جبتك للدنيا وكنت فرحانة بيك, نهار لي حطيتك فيه بين إيديا وبوستك وقلت هاذي بنتي لي فرحت بيها اليوم، ومش نفرح بيها نهار لي تتعلم تقول بابا وماما، نهار لي تمشي اول خطوة وتطيح وتجي عندي.. نهار لي مش نفرح بيها وهي داخلة للروضة وفي آخر العام تجيبلي شهادة وتقلي ماما انا جيت لولا، نهار لي تدخل للمدرسة ونقريها انا-امها المعلمة- ونوريها ونعلمها، نهار لي تنجح في السيزيام ويعطوها جائزة وتتعدا للكولاج وتكبر بنتي وتولي عندها حياتها الخاصة لي تشاركني فيها، تنجح بنتي في النوفيام وتتعدى لليسي كيف ما توا معناها وإنت تقرا بريميار انيي نراك تتعدى عام بعد عام وتاخو الشعبة لي تحب عليها،

سيرين موش إنت تحب تتعدى آداب وتكون في نهار محامية كبيرة! انا نتمنى نراك ناجحتلي في الباك ماو إنت بنتي لي عندي كان هي، موش حكيتلك مرة لي بكلنا نتمناو بناتنا ينجحولنا ويفرحونا قتلك زادا لي شهادة الباك خير عندنا من التخرج، جيتني وبوستني من جبيني وقتلي"يا ماما مش نجيبلك الباك من اول عام ومش تفرح إنت ونرى دموعك وإنت تفخر بيا وفي الجامعة ما نحبش نقرا بعيد عليك، نحب نقرا ونروحلك، نبوس يدك ونشم ريحتك العزيزة عليا المليانة ياسمين"... بنتي سيرين أنا نحبك علاه خليتني نقاسي هكا! تتصور يجيني النوم وإنت في بقعة وأنا في بقعة! ياخي في بالك لي أنا مش نرتاح وسيرين بعيدة عليا، نعرش عليها تاعبة ولا فرحانة ولا تبكي! زعما جيعانة؟ زعما عطشانة؟ زعما دفيانة؟زعما ما تخافش وحدها والدنيا ظلمة عليها ....

سيرين ما نتذكرش لي أنا قتلك في نهار"دنيا وإنت موش فيها ما تتعاشش، دنيا هزتلي كبدي ما رحمتنيش ما نجمش نكمل فيها.." أما هاني نقولك توا يا سيرين وأنا عندي أكثر من اربع أيام ما شفتكش وما شميتش ريحتك" دنيا ظلام يا سيرين ما نرى في شئ، كل شئ أسود، ماكلة ما نذوقهاش وما نعرش على طعمتها شنيا، يدي نحس فيها معاش تتحرك، رجلي نجمش ناقف عليهم، فمي تعوج شويا، يمكن جاتني جلطة، ما خليتهمش يهزوني للسبيطار مش حتى كان متت يحطوني معاك في نفس القبر."

سيرين يا بنتي، إنت كنت يدي الإيمين في كل شئ، في رمضان كيف تبدا زاهية وفرحانة تذكر شنوا تعمللنا وشنوا تطيبلنا، مش إنت متعودة تصلي التراويح كل رمضان؟إنت تغيب وما تحضرش العيد الصغير لي فيه تقولي "يا ماما أنا نحبو خاطر نمشيو فيه لدار جدي ونتلمو بكلنا ونحس لي أحنا قراب لبعضنا برشا" كيفاه تمشي وما تحضرش معانا العيد الكبير! إي إنت متعودة في كل عيد الليل ما ترقدوش والصباح من قبل صلاة الفجر تجي تفيقنا بكلنا تبوسنا وتعيد علينا، إي نعرف العيد الكبير أكثر فرحة تحبها..

سيرين أنا أمك هاك تشوف كل يوم وكل لحظة شادة تصويرتك ونبكي دم عليها مش أنا دللتك وربيتك وقريتك علاه تبكي أمك هكا! لا لا أنا مش متغششة منك، تعرف لي أنا نحبك وتعرف لي إنت الهواء لي نتنفسو وتوا نحس في الدنيا عمال وتضيق بيا، بديت نحس بالدنيا هاذي معاش ليا وما عادلي فيها حتى حد