Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

سكيزوفران

schizophrenie-socialeSonia - سنيا

أنا مرا تونسيّه متحرّره ، على حيطي نسبّ و نقشتل ، نريّش و نقطّع و كان لزم نقشّر ، هكّه فهموني الحرّيه ، نتمقعر و غيري نخيّش ، لخلايق نكسّر و لساني برقبتي مسلسل . قالولي أكره الرّجال خاترني مرا و متحرّره و لازمني نكون من ندٌهم ،

مشيت لماتشوات الكوره و فكّيت بقعتي في البار كالذّكوره ، ولّيت نحكي مالحزام اللّوطه والرّاجل عملتو في صبعي خوصه ، للفجاري نهمل و ندور و كان حبّيت الدّار مانعتّبهاش شهور ،  نقهوج و نشيّش مع صحابي و نڢيّس ببلعاتي و قعداتي و كيفاش نصوحب و نطيّش ، هكّا علّموني الحرّيه .

أنا كونسومتريس و صاحبي كونسوماتور و عايلتي كيف كيف ،الزّطله مش عيب و إلّي يقول عكس هذا متخلّف ڨديم. ماركسيه لينينيّه يساريّه حرّه ، حافظه شويّه نشيد على شويّه شعارات على شويّه نيتشه على برشه تنبير ، الشعر مفرفش هايج و  مرايات مدوّره مخبّيه العينين ، ندافع عالزّوالي أما عندي حقّ حاره بيره ولا ثنين و سهره في  البلوڨ و ركشه في أعزّ أوتيل . الكادحات هنّ الجميلات أما كلّ سبت بروشينڨ و ماكياج و لا نمسّ لا ماعون ولا تنظيف .

أنا مرا محافظه متحجبّه متنقّبه متلكفته على روحي مسكّره أما متحرّره ، الحواجب مصوّرين ، أحمر في الفمّ ينقب العينين ، مريول محزوق و سروال و محرمه مهزوزه لفوق ، بلّوطه في الوجه و مريول بالإيدين أما في لون لبدن ،مانقولش كلام خايب أما نسبّ و نحطّ نجوم ،مانصوحبش كان بولحيه و خوه ، نتعنكش فيه نتلهوث عليه في الشّارع خاتر نخاف لمنّي يفكّوه . شعري مغطّي أما نبوس و كي نبدا معاه زنودي نعرّي .هذي الحرّيه إلّي علّموهالي ، إكذب عليهم جهار تعوقل تحوشم تمسكن تسكبن و في الدّرڨه حدّ مايفيق أعمل العار . زواج متعه و عرفي لا نقعد نستنّى عام لا كرفي أما لكلّو بشرع ربّي

أنا مرا ثقفوت متحرّره قالولي إكتب عالرّاجل أدخل فيه ركبه أعفس عليه مزبلو مرمدو حطّو تحت ساقيك مالا باش مرا حرّه متحرّره .ظهّر إلّي هوّ تفشه ، ذبّانه ، لقشه ، إلٌي إنت ملكه بلابيه ، هوّ عاله عليك ،دوده تنهش فيك ، رمله في عينيك تعميك ، حجره في ثنيّه تعطّل فيك ، مطره في ليلة صيف ، مرض لازمك تداويه ، بركان لازمك تبعد عليه  ..

كتبت و زدت كتبت و تبعوني برشا بنات وولّاو يحلفو بكلامي و يشهّدو بي للعباد مرا متحرّره بعثت الرّجال عاشت حياتها بين لكتبّه ولفلام عاونت ولايا و حرّرت صبايا ، قلت الّي كلمة بايره لازم تتنحّى مالإفّام ومن داخل نحسب في عمري قداش مازالي على جيبان لولاد ، قلت الّي لمرا عزّها وحدها لا صاحب لهفه لا عريس غفله وأنا في اللّيل كيفاش قعدت وحدي نبكي بالشّهقه .كتبت و كتبت للّي جاني مكتوبي و تلّفت الكتيبه و الصّحبه ، نسيت صحابي وإلّي مشاو بكلامي ، نسيت الّي عاونتهم باش تحرّرو و رجعت لداري و لراجلي ولولادي . كهو الحرّيه ماتوكّلش خبزه ما ترجْعش عمر ما تجيبش رجال ما تولدش ولاد ،الحرّيه عند النّساء عندها تاريخ إنتهاء صلوحيّه !!!!

بقلم سنيا

p.s : je ne généralise pas :)

 

 

سكيزوفران