Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

سكر يا بنات

filles-tunisiennes-sefsari

Souha Kouki - سهى الكوكي


إنتوما البنات، بلاش بيكم الدنيا ما تسواش ، بلاش بيكم الحب ما ما يبقاش، كل شي فيكم سبيسيال ، بلاش بيكم ماتكمل فرحة في دار، إنتوما تزهيو كل شي، تعطيو الكل شي مطعم آخر كي النّوار، خزرت عينيكم و فكركم يتذهبو العقول، و يشغلو بال المشغول !


انتوما البنات وردات تزين الحياة و تذوّب الكلمات !حتى كيف تتكلمو الحروف تغير منكم، مشيتكم و خزرت عينيكم و ضحكتكم يخرجو العاقل من سينتو و ملتو و طينتو إلي تلبسوه يواتيكم، لاهين بكل حاجة فيكم، المانيكير الروج إلي في يديكم، طريقة شدانكم في السيڨارو بفيانة...



و خلي عاد العسل الكل في الطفلة الخرنانة و أحلى حاجة فيكم هي بعد البكا كيف تعطيوها هاك الضحكة المزيانة، حتى دلالكم في قومة الصباح مع أصواتكم الرنانة، مرة فيكم برائة الطفولة و الخفة و مرة فيكم الرزانة، الكلكم فيكم بنة ما تلقاهاش عند أخرى، فيكم الحب كلو فيكم الرقة و الخشم في السماء و الحقرة و برا قالو حقارة عاد شبيه يزيد فيك سر على سر يا مسرارة،


فيكم الدلال و الهبال و تزيدو زين على زين بهزان هاك الحاجب كيف يولي الوضع موش عاجب، حتى كي تعطيها ساعة على ساعة هاك الڨحرة إلي ترعب المشرارة تبدى كي البحر غدارة،و آش خير من طفلة مسمامة و مغيارة! الدونتال النوار كيف تلبسوه يزيد فيكم الشطر، حتى كيف تشدو كتاب و تترشفو قهوة توليو تذهبو العقل، ريحتكم تهز العاقل للهبل، حتى لهوتكم بحجابكم و تشقنيسكم و قعدتكم ما تلقى فيها ما تذم...


فيكم حاجة عمرها ما تتلم، فيكم الحنان إلي يقربكم يحس الدنيا فيها الأمان، فيكم مالصغرة ريحت الأمومة، فيكم زادة عمايل مشومة، أما لا تقعدو ديما عسل ديما فيكم العقل و الثقل مخلطين بالهبل، كيف نقول أنثى نقول عقل، نقول بدن، نقول دلال و هبال،


نقول مهما تعمل ديما فيها حاجة سبيسيال،نقول الشعر و الطويل و القصير الأحرش و الحرير،نقول الشفايف إلي بيناتهم لعسل نقول لخدود خدود الورد و العينين الشهل المزينة بالكحل نقول خزرة الحشمة و الحيرة الي تذهب الشيرة، نقول السمرة و البيضة، نقول السمينة و الضعيفة، نقول الطويلة و القصيرة.... كلكم كيما إنتوما مهما كان شكلكم شيهمكم فيهم آش يقولو هوما، مايملى عينيهم شي، أما حبو رواحكم حد ما يستاهل تو يجي شكون يموت و يفنى عليك و يحبك كيما إنت و ديما في حبك ساهر، غيرش كون إنتي ما تقلدش حد آخر

بقلم
سهى الكوكي
سكر يا بنات