Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

سرحة !

solitude-sentimentsSoumaya Rahmouni - سمية الرحموني

ساعات.. احساس ركيك يجيك...

ومالفرحة يهزك و يخبيك...

ويحسك لي انت غريبة بين اهلك و ماليك واصحابك و الناس لي دايرين بيك...

اييييييه ممسطها و مخيبها ! قداش اتعب ! كان السرحة و التخمام..

لعاد تفرق بين الليل والنهار...

ومتعرفش روحك فين... لداخل والا لبرة مالدار! ملا حسرة مشومة تخليك مهمومة...

تفكرك في عمرك لي تعدى كالعزوزة القرومه...

لعمر قاعد يمشي ... طاير طيران !!

وانت مازلت كيف الطفلة الصغيرة لي تخاف حتى من ضوء النهار ..

.ايه ثبت في روحك و زيد اخزر ...الشعر اهوكا طوال العينين وساعو كبار...

و خزرتهم حاره نار... الساقين ساين غزال...

و حتى من صدرك دز روحو و بان!!

مرا و عليها لكلام ...

اما مخك يا بنوته... مازال عايش في الظلام ...

اووووه علية ساعات نسال روحي ونقول... شبيني جيت بنية !!

كل شي نحسو صعيب عليه !! وكل مانحب نبدل ثنية بثنية ...

نلقى الحكايه صعيبة خاترني بنية ...

الليل يليل و مواجعي تتحير... نغزر للمراية و نقول زعمه انا شكون !! 

زعمه نكمل نخمم  و نسرح و الا نفيق منوم

... لا.. لا.. لا !! فيق تكبس يا صبية ..و شد الثنية ! 

اخزر القدام واياك تخاف مالضلام...

  !!و تعطيهوش الامان ..

.ولي فات و تعدى راهو ولى و عدى... والجاي ديما خير ...

مهما صار و يصير


سمية الرحموني

سرحة !