سامجني
Amen Rezgui - أمان الرزقيسامحني
مانيش ربّي نحلّ بيناتنا في البحر طريق
و نسبق لبلاء و نجيك ,,
نرميلك في الظلام الشمس على كفّك
و نبوسلك يديّاتك ,,
كي تقلّي بدلالة تشويت
سامحني ,,ما انّجّم كان نعوم بيك في الغريق
كذبت عليك و قتلك بثقة
فنّانة .. حياتي عدّيتها نتحسّس في الثناياعلى ظهر وريقة
سامحني ,,
لبست سما أكبر منّي .. و جريت
و ما قريتش حساب نهار ندعثر فيه ,, و نتفشّخ
عمرو ما غلبني ستيلو و لا ورقة
إلاّ جبينك ,,
لا نجّمت نكتب فوقو و لا نفسّخ
ايجى عندي ,,
طيّش راسك في حجري و احكيلي
عاللي مشى و ماعادش يرجع ,,
و عاللي رجع من غير ما يشاور
ارمي دنيتك فوقي ,, و انت فيها
و الصّباح و انت خارج ,, خلّيها
قلّي الراجل ما يبكيش ,, و ابكي
زيدني وجيعة على وجيعتي
و سامحني
كان غفيت على صدري ,, و يدّي عبثت بيك
سامحني
ما انّجمش نقطّع مالسّما و نغطّيك في برد لياليك
سامحني
مانيش حطب النّار اللي شاعلة فيك
سامح فيّا فقري ,, اللي ما يبنيلكش في الجنّة دار
و يتجرّأ في اليقظة .. و يحلم
يجيب منّك برشة صغار
ايجى عندي
نحلّ غرز قديمة ,,و نفرّشلك الدّنيا في قلبي ,,
نغطّيك بالشوافر ,, و ننساهم مغمضين
نخاف نحلّهم ,, يراو خيالك في تراكن العين
و يكثر الملام
سامح صغري اللي هزني نلعب قدّام دارك ,,
و دقّ في القوايل بابك
و سامح كبري اللي ما خلّانيش نهرب
قبل ما تحلّ الشبابك
سامح غناية كذّابة ,,
باسم الفنّ سمّعتهالك
و كلامها قصدتو ليك
و سامحني كي نحبّ نهرب منّك ,, نجي فيك
سامحني على الكلمة اللي قلتها بعد الحكاية بحكاية ,,
و الكلمة اللي تولد في القرجومة و تموت
و سامحني ,,
زدتك فوق حكاياتك حكاية ,,
سامحني
خاطرني نحبّك ,,
و أنا بكّاية
_________________________
سامحني كي نقلّك برشة سامحني
بقلم
أمان الرزقي
Website Design Brisbane