12 عام توّة تعدّوا، و لتوّة متبدل شيء ، احساسي هوّا نفسو ، ضحكتي كي نسمع اسمه هيّا نفسها.

زعمة ماخممش فيّا سنين هاذي كلّ ؟

كي نتفكر كيفاهه اوّل مرّة كلّمته و ڨتله " نحبك ... " و علّقت فيسع ڨلبي يجي تيُخرج من بلاصته ...

لتوّة نتفكر اش رجّعلي بالرغم المدّة إلّي تعدت هاذي الكل(12 عام)

  " sans que tu me comprends mal, j'espère qu'on reste des simples amis ou des frères pas plus ...".

نتفكر بقيت نهارات و انا منكلم حد ،منكلش ، ڨاعدة كان ناكل في بعضي " علاش ڨلتيه؟؟ علاش تيحطي من كرامتك و ڨلتيله ؟؟ كفاش تتقابليه توّة و تحطي عينيك في عينه ؟؟؟ " لين جا اليوم الموعود و قابلته : ڨلبي ڨريب يحبس و انا نشوف فيه جاي عارضني من غادي. زعمة آش تيڨلّي ؟؟؟ الّي صدمني انّه تصرّف عادي كأنّه ما صار شيء .

بقينا باعد هاك الفترة هاذيكا صحاب برشا، امّا انا منجمتش نخبّي الّي نحسّ فيه ،حسّيت كأنّي نكذب على روحي .و حسّيت إنّا قربنا ياسر من بعضنا ، لين ليلة قبل 4 سنين هكّاكا و حنا نحكوا ، غلبتني مشاعري و ڨتله راني نحبك مرّة أخرى ... و كي العادة نفس الجواب  و يبقا ديما اكلّم فيك  و يجبد فيك . انا نبعد و هوا يجبد و لليوم مزّلت نحبّه و هوا لتوّة يسأل و يكلّم و ينصح  و يفرح معايا و يحزن معايا و كل شيء امّا انا ڨاعدة نعيش في حب واحد من طرف واحد لمدّة 12 عام .