مش كلّ حاجة تتشاف ناخذها و نحطّلها مندافْ ..

مش كلّ حاجة مزيانة نخطفها وتولّي كان ملكي أنا ..

مش كلّ حاجة عجبتني وحبّيتها نويتْها لروحي و بإسمي سمّيتها ..

مش كلّ حاجة ركّزت معاها حبّيت نُوصللها .. و بكيفي خلّيتها وما عطيتها الجّنبْ وما ملتلْها ..

مش كلّ حاجة تلْمع جريتلها .. ولا كلّ حاجة عالية تشعبطّلها .. ولا كلّ حاجة مسّتلي عقلي قبل قلبي آمنت بيها و بأسراري بُحتلها ..

أما كلّ حاجة قعدت في بالي .. شدّيت الورقة و السّتيلُو و كتبتلْها ..

___

الشّعر الأكحل و العينين الشّهُل .. إلّي اللّمعة فيهم تنسّيك في الدّنيا هذي الكلّ .. بُوسة الخال إلّي في الرّقبة .. و الشّفايفْ الحمُر إلّي كيف الرمّانة .. حمرة من برّا ومن داخل مليانة ..
مليانة بالكلام الباهي و التّبسيمة .. ياخي فهّمني ما تضحكش وإلاّ مخبّي ضحكتك علينا ؟

الرّزانة .. السّياسة .. و الفيانة .. فيانة أوّل مرّة نشوفها في راجل .. كيفاش بش نفسّرلكُم ؟ إيجاو خُوذُوا عيني شوفُوا بيها ..

___

فنّان .. السيّد يفهم في كلّ الحاجات .. تشوفو مُمثّل .. شاعر .. كُونتابلي .. ساعات تشوفو طبيب و ساعات أمّك صنّافة ومن غير ما تزيد تركّز لا تغرق أكثر فيه .. و في التّفاصيلْ ..
التّفاصيل إلّي توصّلك حتّى في اللّيل تحلم بيه .. و تقوم الصّباح تلقى روحك هو أوّل عبد تخمّم فيه .. وماضابيك تكمّل عمرك معاهْ .. وما تسلّم فيه ..

___

ما تسلّم فيه ؟ شكون قال من قريب باهي ؟ ماهوش خايب و دُوني و يخلّيك تعدّي حياتك تلاجِي وإتبّع فيه ؟

ما تسلّم فيه ؟ و إنتي من أصلُو تنجّم تعطي فيه الآمان ؟ يكتب ومغرُوم بالتّيياترُو و الغناء .. تنجّم تصبر و تتحمّل الكلام الباهي عليه من عند العباد و خاصّةً النّساء ؟ وإنتي إلّي ما تحبّ تقسم حاجتك لا مع فلانْ و فلتانْ ..

___

إفهم يا عقلي إلّي أحنا بطّلنا اللّعب بالنّار .. و رانا ماعادش صغار .. ماو قتلك مش كلّ حاجة تعجبنا نحرقُوا بيها يدينا وماشي فيبالنا عملنا آفارْ ..

يا عقلي أنا نكتب أما قدّامُو و قدّام ضربان لوغتُو نتّكونسَا .. نحبّ نقرى العينين أما كيف يحكي معايا هو ماتلقاني كان راسِي مطبّسة .. نحبّ المشية في المدينة وأوّل مشية معاه نعرف ماهاش بش تتعاود ديما ..

يا عقلي هذا إنسان يخوّف .. وأنا إلّي ما كنت نخاف .. مافيباليش نهار بش نقابل سحّار .. من أوّل غزرة ليه في هاك النّهار .. تقلبتْ الأفكارْ .. وقتلك يا عقلي أُرقد وأخطاني .. هذي سماء بعيدة .. هذا باب عرشْ .. هذا ماهُوش عصفُور عادي .. هذا نسِرْ .. نسِر بوقفتُو و الثّقة إلّي تخلقت على جالُو .. نسرْ و أنا آش معرّفني فيه وآش جابني لحالُو ؟

___

مش كلّ حاجة تعجبنا و تتشافْ .. يا عقلي نحطّولها مندافْ .. خلّيه كيف الرّسل الكلّ إلّي نمّنُوا بيها وما نعرفوهاشْ ..

خلّيه بعيد بُعد السّماء على الأرض .. و بُعد الشّرق على الغربْ .. لازم عليك بش تعرف العمر و المهنة و إسم الأبّ ؟

ريضْ يا عقلي

و أتو نهار ترجع لكلامي و تعرف علاشْ ..

بقلم رواء الخويلدي