ردمتها ..تصويرة صغري ردمتها...بشويا لعب الدنيا فهمتها... الحلوى و العنب و بشوية كتب قريتها قرايا و تعلمتها... لبست روبة صفرا و زدت شمرتها... بيديا أكالروبة قصرتها.... شلاكتي كركرتها ... شلك شلك حياتي شلكتها... حسبت بالغالط و لعبتها ... ياما قلت فهمتها... وأنا الدنيا في القطن درتها... بشورعها و زنافيها و حتى بخربها ... ما فماش حاجة ما جربتها ... تصورتي لونتها ... و كي ضاع عليا اللون في وجهي لصقتها... وتوا كبرت و ردمتها .... ما نيش غافلة و الفيستا ما قلبتها... في بلاصتها ليوم علقتها ... كيف كلمتي فسختها... و تصورتي ردمتها...

توجعت وما بينت ... أما قلت إلي أنا تعلمت ... صحيح في صغري تزكمت ... و طلع سراب لي حسبت ... طاح في الماء ملي شفت ... تعبت تعبت مالجري تعبت... لوجت فرزت ... طحت و قمت ...تكربست... عاودت لعبت ما خفت ... في الغريق عمت... شربت الماء و ما غرقت.. أنا ليوم فقت... حليت عينيا و بالدنيا حلبت...

تشامات عليا كي ضعفت....صغرتني و رخصت... ما قلت يوم ندمت... كفيلي ما ريت شي كفيلي ما شلقت...

الأسامي مش هي الأسامي ... و التصاور لي تغطاو قبل قدامي ... ليوم تعارو و تصورو ... قدامي كورو ... و هنت ... ياما في صغري هنت ...

كي قالوا مسكينة تجنيت هبلت.... من كلامهم المر شربت ...

نرجع للأسامي و إلي تفسخ من كلامي ... كان لبارح قدامي ... كلمتين و ضحكة فيهم برشا معاني ... و ليوم قعدت نعاني. ...

نرجع للأسامي ... وينهم أش صار وين إديتهم يا دنيا...وين دفنتلي أحلامي .ً.؟ أنا ريتهم شنوة لي تبدل و علاش فسخت كلامي ... ؟

حبيت نتكلم نجرب صوتي بالك الجملة يكمل..... بالك في الظلام ينور... لكن خسارة كلامي تسنسر ...

ندور ندور و نرجع للأسامي و لي تفسخ من كلامي ...قدام شكون قتلتني في منامي ....

ستيلو في يديا يرعش... وإلا يدي هي لي ترعش... قلبي يوجع تمهمش...

حطيتولي على فمي كمامة ...و فوق عينايا لبستوني عمامة..

و. يدايا بسلاسل رنانة ... ويني من قلوبكم لحنانة ...

صحرا و جمل ... شاقق الرمل... في همومو يتحمل...

علاش أنا... يا دنيا علاش أنا...

ما نحبش نشوف ما نحبش نسمع أما قلبي وذانو سمعانة ....

عيني تبكي ورا لعمامة ... علاش أنا ...

حبيت نفيق بربشت ويا ريتني في يوم ما فقت... يا ريتني سفيت التراب و شرقت... يا ريتني مت مت ولا فقت....

توا تجمو تصفقولي... وعلى العالي تاقفولي خلي نملى عيوني.

الستيلو ليوم كسرتو و صبعي كان مازال يكتب حرف في حبارو غرقتو .... و الكلام الليلة شنقتو ....

نزيد نرجع للأسامي و إلي تفسخ من كلامي ...و إلي طار من أحلامي ....

علاش بربشت .. علاش شفت ... علاش تهزت أيامي...

دفنت راسي بين يديا ... عارفة أخرت هالثنية ... عارفة لي كنت نسهر لصبحيا نستنى الفرحة تجيني تونسني و تسئل عليا ليوما نلقى كلمتي منسية... و إسمي بيناتهم مالقاش ثنية

...وينهم الأسامي ...وينو لي تفسخ من كلامي؟؟؟؟؟؟؟؟