وقفت على شباكي نتذكر

في نهار مطر و رعد يزعزع الدنيا  نتذكر

أنا وحدي بين اربعة حيوط قلبي بعدك بارد

مانجمتش اندفيه في يدي كاسك الي تحبو

نقلب فيه و نتذكر القهوة لي تقومني عالصباح  

باش نطيبها

و تقلي عبيه

بعدت عالشباك كيما انتي عليا بعيد

نلقا كرسيك قعت و رجعت نتذكر كي تبدا متكي عليه تجبدني بالسيف تحطني على ساق و تفشلني ببوسة الصباح وتقلي اقعد خليني نشبع بيك و كي ترجع فالليل تلقاني قاعدة عليه

نستنا فيك

قمت مالكرسي و بعدت عليه

و مع كل قُطرة مطر قلبي يبكي عليك

قلت خلي نشد فرشي بالك النوم انسيني فيك

و اذا بيا نتذكر فيك في لحيتك و عينيك

في عركنا عالمخدة العالية شكون ياخوها

تنحيها من تحت راسي و تجبدني ليك و تقلي تربّع فوق قلبي واحكيلو علي بيك

توحشت يديك كي تكبش عليا و تقلي ايجا يا روحي ندفيك  

توحشت كي نقومك في نص الليل بعد الفيلم الي كرّيت عليا باش نتفرج فيه

تقربلي و تقلي ايجا نخبيك تاخذني على قد عقلي و تقلي أرقد ما تخافش هاني نعس عليك

طار النوم المحنون ما تغمضتليش جفون و بلاصتك فارغة بجنبي

مشيت للكوجينا شعلت سيڤارو قلت خلي نحرق الي قعد منك في وسطي

شي ما نجمتش نفك قتلني وحشك

مع كل نفس نتذكرك كي تفجعني و انا نحظرلك فالعشا

تحملني و علي الطاولة تلوحني تضحك و تقلي انتي عشايا و فطوري

توحشتك كي تراني نكتب تقلي اقرالي تقعد مقابلني و تبدأ تسمع فيا و تقلي زيدني يا نور عينيا

توحشتك كي تجي تعاوني وتزيد تهبلني  

توحشت هيجتك و لعبك الماسط

طفا السيڤارو و النار الي في قلبي مازالت

حليت بابي قلت خلي نغسل روحي منك بماء الشتا خلي نملى قلبي بالهوا

طلع عليا الصباح وانا على الدرجة نستنا فيك و كيما كل يوم انتي ماتجيش

مشا فيبالك الشمس الي طلعت عليا باش تنسيني فيك لا ياروحي زادت ذكرتني بيك ذكرتني كي تقومني بالسيف تحملني و تلوحني عالزليز تضحك عليا و تقلي قوم يا بخلية

و رجعت دخلت وانا باقي نتذكر فيك

و في الآخر رقدت بلا بيك

رقدت ومانيش باش نقوم فماش ما تحن عليا و فالحلمة طل عليا