Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

رجعت الشتوية

pluie-nostalgieMaryem Ayari - مريم العياري

رجعت الشتوية

رجع صوت المطر الي ترقد بيه و تفيق عليه

ريحة التراب المبلول الي تغرق فيه

رجعت القهوة و ريحتها و كي تستحلا سخانتها مدفيتلك القلب البارد الي عليك و صوت فيروز الي ما تحلى الركشة و الكتيبة كان بيه

رجعت لمراول الصوف و ليدين لمشلفحين

الحب و اليدين الي في شونو دفيانين و الراس المغروس في حضنو بعيد عالمطر و العينين

رجعت الشتوية

قطرات لمطر الي تغرق الكياس ،تفيض لقموم و يفيض معاها الكاس

رجعت الطبعة للعنكوش و الصباط الجديد تروح بيه كيفك كالفلوس

رجع البرد و البرق الي يفزع هاك الصغير الي ملوح تحت الساقين

عضامو يرجفو بردانين يلوج على كرضونة دفيه و تستر بدنو الذليل

رجعت الدموع مالية العين لا تفرق بينها و لا بين قطرات لمطر عالخدين

هام قالو السنا أبرد شتاء يتعدى علينا اما زعمة يجي أبرد مالقلوب القاسية المغروسة فينا !

بقلم مريم العياري
رجعت الشتوية