" راجل"...بين ظفرين
Saïda Aïcha Darragi - السيدة عايشة الدراجي
....أرجعلها
موش قلت هي إلي لاهية بيك وفي بردك ادفيك
هي إلي تبشبش بيك وكي تحزن إتزهيك
هي إلي ادللك وفالشيخات تغرقك
تشتحلك وتتزعبنلك ومن اللذات تشبعك
!!وإنت...تعطيها منغير ما تقلك هات
..هي إلي عمرها ماتلوي العصا في يديك
وكل ما تمشيلها تلقاها تستنى فيك
سحرتك بكلامها و ببدنها إلي عمت فيه
!حسستك إلي إنت سلطان وعرش قلبها إنت إلي متربع عليه
!هي إلي تقلك بين يديا تملك العالم بين يديك
تقلك أنا في الدنيا وحتى في اسمك إنسيك
تبعتها.... وصحيح إلي قالتو صدقت فيه
وجاء النهار إلي فيه ... صغاركك و مرتك ولاو أغراب عليك
!أرجعلها ....أنا معادش حشتي بيك
كيفاش تحبني نعاود نأمن فيك؟؟
!وانا معادش عندي ثقة فيك
أنا إلي فنيت عمري بين يديك
و قفت معاك وعاونتك حتى لين و قفت على ساقيك
عطيتك شبابي وحياتي وقلت موش خسارة فيك
أنا قد ما صار عمري ما بعدت و إلا تبدلت عليك
و عديتلك ...خاطرني حبيت نهني عليا وعليك
أنا يا "راجل" من قلبي حبيتك وحياتي وهبتها ليك
كنت ديمة ندلل فيك وبرشة حاجات ستخسرتهم في روحي أما عمري ما ستخسرتهم فيك
وحتى خدمتي سلمت فيها باش نزيد نتلها بيك
قتلك انا أمك وأختك ومرتك وأي حاجة تحبها تلقاها بين يديك
انا إلي عمرو صوتي ما على عليك والا بلسيف فرضت فكرة عليك
احنا كنا عند الناس العائلة المثالية ولكلهم كانوا يحسدو فيك عليا
..مافي بالهمش إلي الماء يجري تحت ساقيا
...وفاللخر
فاللخر عشرتي هانت عليك
خاطرني كبرت وبدني معادش يروق ليك
جرحتني وبكيتني ...وخياتني سهالة عليك
إنت بعتني... وعلى خاطرها هي أنا وليت معادش نواتيك!
أرجعلها ....أنا عمري ما نرجع ليك حتى لوكان روحي فيك
قلي أنا توا شنوا نعمل بيك؟؟
شنوا نعمل "براجل" قلبو أناني مايحب حد؟؟
يخرج من دارو و يخلي مرتو و صغارو
و شهواتو و نزواتو أول أولوياتو
"راجل" خرجني من حسباتو ومنغري حب يكمل حياتو
!!"راجل" قتلني نهارت إلي بعينيا شفت خيانتو ليا
!أرجعلها ماهي هي إلي نساتك فيا
ما تبكيليش!! دموعك ما يهزونيش
توا جاي تقول من غيري و من غير صغارك ماتنجمش تعيش؟؟؟!!
مالا شبيك في عينيك ما حطيتناش؟
وقبل ما ادخلها لداري و ترقدها في فرشي ماتفكرتناش؟؟
كيفاش...؟؟؟
هي غلطة و توعدني ما تعاودهاش!
?!!ما تعاودهاش
!ما تنساش إلي فيه طبة طول عمرها ما تتخباش
!و إلا المرة الجاية تقرا حسابك، و لداري أكهو مدخلهاش
اسمعني يا ولد الناس ،انا خيانتك ما ننساهاش
ومهما تقول كلماتك ما نسمعهاش
وكرامتي بكنوز الدنيا ماتشرهاش
...خسارة انا ما عرفتش نختار
!في بالي بش نعيش فالجنة لقيت روحي فالنار
وتوا لا حشتي لا كرهبة ولا بدار
حشتي بالصغار ؛ انا نربيهم و عمري نعطيهم
و مهما يصير ما نسلمش فيهم
!وحتى فلوسك ما حشتناش بيهم
!أعطيهملها هي تستنى فيهم
!أرجعلها....أنا عمري ما نرجع ليك حتى لوكان روحي فيك
!وهي يجيها نهار وبالنار إلي حرقتني تتحرق خاطر "الراجل" إلي بين ظفرين يخون مرة.... وساهل عليه يخون مرتين
السيدة عايشة الدراجي
Website Design Brisbane