اصحاب، حباب سميهم الي تحب

زوز خايفين و في حب بعضهم غارقين

ديما يحكيو. و همهم لبعضهم يشكيو ، كي يبقى نهار ميحلش تتحير عليه و تقلب الدنيا فب خاطر عينيه

هو يحس بيها كي تبدا بها حاجة متحبش توريها و يعمل المستحيل بش يزهيها

هوما صحاب و في الشدة يواسيها و مالجرح يداويها .

هي تحب تعرف عليه كل شي اما هو غامض مضاويلها شي

هي حلت باپ بلى عليها ، تحبو و هو مش حاسس بيها ، خايفة تصارحو و يخليها ..

هو يحبها و يموت عليها ، اما ميحبش يظهر و ترسيلو واحل فيها

يخاف هو يقدم و هي توخر

هو يمشي و هي تجي

هو يتكم و هي عليه تسلم

اما هو فيها مش مسلم

هي تخاف منو و عليه

تخاف تحبو و توحل فيه

تخاف هي تغرق و هو يعرف يعوم

اما هي لغيرو مش بش تكون

اصحاب ، احباب سميهم الي تحب عليه

زوز خايفين و في حب بعضهم غارقين

تغزل كي يبعثلها تصاور بنات مكحلين و يفد كي توريه ولاد حلوين ،

هي ديما تلمحلو بحبها ليه اما هو بهيم مش فايق بيه ، مش فاهم روحو و لاهي فاهمة عليه

هو ساعات يحبها و ساعات يسبها ، ساعات يرعاها و ساعات ينساها و يطفيها

يخاف يخسرها و تموت صحبتهم النضيفة الي مش بالحب نحيفة ، يخاف يحبها و تحبو و يموتو في عش حبهم ..

يخاف يبنيو دنيا وحدهم ، بعيدة عالناس البهناسة و النسناسة ، دنيا فيها هو الامير و هي لبرانسيسة

يخاف يستانس بريحتها و شفتها ، بخزرة عينيها و تذبيلتها ، بخدودها و حبوبها ،باايديها و سنيها ، بضحكتها و تيسيمتها ..

تخاف تستانس بحبو و دلالو، و بلهوتو و حنانو ،بريحتو و تعنيقتو ،بشفتو و تبسيمتها ، بلحيتو و لمستها ، لايديه و خزرة عينيه ..

يخافو يقومو مفجوعين من حلمة فيها دنيا مش دنيتهم ، يلقاو رواحهم في بلاصتهم ، الفرصة مش فرصتهم و الفراق حصتهم ..

تخاف تحبو و تموت عليه

يخاف يهبل بيها و تخليه

يخافو على بعضهم و من بعضهم

زوز صحاب ، احباب سميهم الي تحب

اما هوما للشوشتهم غارقين ، هي شاهية و تنقز و هو حاب و خشمو غلب عليه

حكاية زوز صحاب في الحب غارقين و مالفراق خايفين ، خليهم صحاب خير ، لا وجيعة راس و لا دوا عينين ..

صحاب مغرومين و مش مشلقين .