كلمة سمعناها و مازلنا نسمعو فيها...الله غالب هو "راجل" مانلوموش عالرجال و مانحاسبوهمش..

باهي .. و المرا ..شبيها المرا ..الزلقة بفلقة ..اي المرا ماعندهاش الحق تصوحب ..تتكيف ..تسهر و خاصة "تحب" ..الي يسمع يقول هذي تخلوض..اي لمرا ماعندهاش الحق تحب قبل ما تعرس..الحب متاع الكبار ..الي تحس فيه ببدنها مش بقلبها ..

باهي علاه ما عندهاش الحق..الحكاية ساهلة ..خاتر عيب و حرام ..خاتر تولي بيها و عليها ..و تمسخ شرفها و سمعة والديها..و ربي يحرقها من شوافر عينيها ..و تعيش ذليلة بين اهلها و اماليها ..و تزيد تلقى العذاب في اخرتها يستنا فيها ...

ملا قلي الراجل كيفها زاده ...لا لا ..الراجل يحب ليل مع النهار ..في الشارع و في الدار..لا عاد هامو لا عيب و لا عار .و ساعات يوصل يحب اكثر من مرا في النهار ..هههه قلبو كبير .. و يسهر معاهم في البار..و ساعات يهزهم ..ولا "يهزوه" هوما للدار ..يعملوا في حاجات متع "كبار"...يعني كيفو كيف المرا ..يغلط و يتحاسب ..و سمعتو تتمسخ و قدرو يطيح ...لا لا ...الراجل ما يصيرلو شي..علاه ..كيفاه..خاتر هو راجل ..خاتر امو قالتلو ملي هو صغير .."ميسالش بابا ولدي راجل ..اكبر و جرب و اتعلم ..ولدي راجل ما يبكيش" و "البنوتة" من صغرتها مكبوته العسة و العنين عليها..ما تعمل حاجة الا ما تقول عليها...

خاتر هو الراجل ..يغلط ..و ما يخلصش...هكا قالونا هكه رباونا..و هي مهما يكون "تبقى" مرا ..تستاهل جابتو لروحها ...حتى كان مظلومة تسكت و ماتتكلمش ..تبلع السكينة بدمها ..خاتر الراجل و عالم الراجل حبو هكة ..لا دين و لا منطق قال هكة...خاتر الراجل قال هكه و الرجولية مش كلام ..حاجة غابت في هالزمان ...هههه و من بعد يجي عم الراجل .. يعمل عقلو و يحب يلم سويقاتو...اي لازمو عروسة "بنت فاميليا" ...اصل و مفصل ..خليقة و خلوق ..ايييه عادي ما يتشرطش برشة ..حقو .. راهو راجل ..يحبها مش كيفو بالطبيعة ..قطوس في شكارة.لا شافت و لا رات ..ما سهرتش ..ما تكيفتش..ما شربتش ..و خااااااااااااااااااااصة اهم حاجة ..ما حبتش قبل ما يحبها هو ...محلاه الراجل..عادل ياسر و لوجيك في مخو ...و محلاها الرجولية الي كيف هذي ..الي نشوفو فيها تو ...كيما عند القاري كبما عند البطال ..كيما عند الغني ..كيفو كيف الزوالي ...خاترهم رجال  ...حقوق "النقد" محفوظة للقلة القليلة من الرجال

بقلم سمية الرحموني