Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

نحب حوايج العيد

pere-filleMaryem Ayari - مريم العياري

تعرفها اكا الغصة وقت تحب تكتب حاجة و تنجمش ؟

هاك الخنڨة كي يبدى لكلام محصور في الڨرجومة اما الستيلو عامل عليك بلعاني ؟ وحتى كان حبيت تكتب تخليها بيك لبلومة ؟

يمكن خاطر عندي برشا حروف مش منظمين .. برشا كلمات مش مركبين برشا سطور مش مسطرين و ألف جملة و جملة ما تنجم تحكيها كان دموع العين ؟

و شكون قال انا كاتبة و شكون قال لكتيبة ترتح ، لكتيبة تفرح و تهدي سر لمهموم وتفرح فم لحزين وألي زهرو مكبوب !

قلي عمرك كتبت و انت فرحان ؟ و انت ناسي ، زاهي، عايش بضحكة مالڨلب خارجة مالجواجي

مش هاك الضحكة الصفرة من داخل تحسك بالقهرة تمسكي بيها على لوجوه ألي ماتفهم ؛ تغلط بيها الناس ألي ماتحس !

احنا انانيين..

أي انانيين ما نتفكروها هالكتيبة كان وقت الحزن و ليلة طويلة الي الدمعة تسيل وحزن يعزف نغماتو .. وقت تنساك الدنيا و عبادها و تقوم تلقى روحك وحدك...وقتلي حد مايحس بلي تحس فيه وحد ماباش يفهم قيمة ويقدر لوجيعة ألي صابتك

وقتها كهو تلقى قدامك كان هاك لعشير و الورقة لحنينة .. ألي تكتب عليها نغماتك لحزينة .. كلمات ماتوقفش ؛

دموع ماتمسحتش ، يتخلط لحبار بدموع متخبية بأوراق تحضنها وتمسحهها

تعرف يا بابا !

انا عمري ما كنت أنانية ... و خليتك و عمري لا تلهيت بالفرحة و نسيتك ! كيما عمري ماضاقت بيا ومفقدتكش ..

و حتى غناية تفكرني بيك

علاش انت نسيتني ؟ و عندك مديدة عليا ما طليت ..

كان تستنى في العيد بش تجيني؛ نقلك من تو ما تجيش ،غضبانة اي غضبانة و ماك تعرفني كي ناخذ في خاطري عليك ..!

حتى نهار نجاحي نستنى فيك تظهر قدام عينيا تعنقني نشوف فرحتي في عينيك اما انت طفيتني و حتى في المنام ما جيت !

اما كان تطل عليا و في يدك حوايج العيد أتو نخمم يمكن نخمم و نرضى عليك ..

الله غالب سنستني بالدلال و كي نشوف يديك فارغة نعرف حاجتي في الجيب ..
>
مريم العياري
Save نحب حوايج العيد