حلمت.. و الحلمة كبيرة ..
Ghada Triki - غادة التريكيكتبت و فسخت
مالقيتش لكلام إلي يحكي
على حالتك يا قلبي...
بنية صغيرة نستها الدنيا على عتبة الحلمة
دزت الباب و دخلت ...
سحرتها ألوان..
لا لقات حيط يوقفها
لا باب على جواجم قلبها يفارقها
دارت، فرحت رمات النوار على شعرها
الدمعة من الفرحة خانتها
طاحت على خدها الأحمر، فضحتها..
حلمت و الحلمة كبيرة
و هي يا عيني بنية صغيرة..
دخل سيدي على غفلة
تسحر بغزرة عينها الكحلة..
من بعيد عس عليها..
لقاها سارحة في دنيا رسمتها بيديها..
عجبتو.. سحرتو..
من سابع سما هزتو و حطيتو..
هي ادور مفقتش بعينيه كيف كلتها..
لين جات العين في العين..
وقتها الدنيا دارت بيهم لثنين..
الوقت وقف بيهم و بدات الحلمة تزيد تكبر في عينيهم..
زراعلها في صحرتها جنينة..خالها تصدق الزينة..
حلمت و الحلمة كبيرة
و هي يا عيني بنية صغيرة..
و تعدت أيام و هي بحلمتها فرحانة..
لين جا نهار لا جاها لا على الخاطر لا على البال..
بدا في نهار يعافس على النوار
بسرقة على عين الشمس.. شعللها في ألوانها النار ..
سرقلها حمرة شفتها.. و خالها تقاسي بعللتها..
حبيتو و هو زادة حبها..
أما معرفش يفهمها و لا ممكن حب يغمها
لقاها صغيرة و متعرفش..
حل ظفاير شعرها..
يديه تغرسو في بدنها..
و كيف سيبها تحرقت..
تمنت يطفي نار لاهبة.. بشرتها ذاهبة..
أما عجبتو حيرتها.. لحبها لا صبر عليها
و هي لا نجمت تمشي و تخليه..
صعبة عليها بعض لحلمت معاه و به ..
مازلت لليوم.. عايشة معاه و ليه
و هو لتو يهوم نهار يحب و نهار عليها يتقلب..
هاني قاعدة يا عيني معلقة..
لاهي معرسه و لاهي مطلقة..
حلمت.. و الحلمة كبيرة ..
و هي يا عيني بنية صغيرة ...
بقلم غادة التريكي
Website Design Brisbane