حبيتك ..

حبيتك و عرفت الي باش يجي نهار و نلعن فيه الساعة و نهار الي عرفتك فيه ..

النهار الي ريتك فيه و عينيا ترشقت في عينيك و ضلوعي مسّت ضلوعك و بحرارة روحك تهزت و تنفضت ..

حبيتك و عرفت الي باش نندم على كل لحظة و دقيقة و ثانية عديتهم سارحة في خيالك..

في مشيتك و غزرتك و ضحكتك و دلالك..

حبيتك و عرفت الي باش نمشي عالجّمر في بلاصة الورد و النوار و تتكوى كفوف ساقيا بالنار..

الكفوف الي بستهم فوق الجراية فاكالدار ..

تتفكر؟

دارنا و كاساتنا و غناياتنا و فنارنا و جارنا الي عيط يزيوا مالحس بعد ماسمع خنارنا ..

تتفكر البوسة المرصوصة المسروقة بين رفوف الكتب في تركينة في البيت..

كتب كلاتها الغبرة و عشش فيها العنكبوت و ريحتها ولات مندية كيف قلبك بالضبط لي خرجت منو ريحة خايبة ماتطاقش بعد ماحاولت نبرفنهولك بريحة حبي ، ريحة الورد و الياسمين و العنبر و النوار..

تتفكر؟ كي قتلي نحبك نرمين .. ماقلتهاليش اما حسيتها مالدموع المزغللّة في عينيك..

حبيتك و عرفت الي باش يجي نهار و روحي تفارق روحك و ترجعلي تتيتم كاليتيمة تتڨروح مالبرد ماكلتها الوحدة و العفن ..ناقصها ضلع و الا زوز و الا ثلاثة ...

ثلاثة؟ واحد .. اثنين .. ثلاثة .. حل عينيك جبتلك كادو تتفكرني بيه ..

لا لا كادو باش انجم نعدي معاك ليلة مزيانة و نخرّج منك البنية الدلولة الزعبانة ..

اشطحلي بصوابعك على بدني .. جع جع جعجوناا.. دب الفار ميموناا.. و ميمونا ماعادش حبيبتنا و ماسرقتش خميرتنا ..

انت سرقتلها قلبا و عصرتو و خمرتو و شربتو كالشراب الاحمر المعتق .. ماني نعرفك تحبو ..

تمنيتك تحبني كيما تحبو و الا حتى تحبني كيما الخاتم الي في صبعك..

حبيتك و عرفت اما حسبت روحي ماعرفتش ....

احد.. اثنين .. ثلاثة ..

يا ليت جيت مانعرفش نحسب ..