غمض عينيك..وآتفكر كل لحظة جمعتني بيك

تفكر كلامي..  دلالي ليك وسلامي ..تفكر لهفتي عليك و النهار إلي تمنيتو يجمعني بيك.. تفكر وقت تحل في الصباح عينيك تكلمني وتقلي نهاري ما يبدى كان بيك،تفكر كيف كل ساعة تتفقدني و تطلبني وكيف منهزش عليك تتغشش وفي العشية تعاتبني تعاقبني وعليك تبعدني..تفكر كيف نقعد بالساعات نكلم ونرضي فيك لين تفضحك غيرتك وتقلي فيك حياتي وصعيب نسلم فيك.. تفكر في كل عشية كيف نقعدو في وسط الدار شوية ..نترشفوا من نفس الفنجان قهوتنا المقدية ونحسك بجنبي في الوقت إلي إنت بعيدة علية..

تفكر كيف نصبحو نحكيو في كل شيئ لين يهزك مني النوم ونقعد للفجر نستنى فيك لين تقوم  ..تفكر وقت الشقيقة تعمل فيك..تطلبني وتقلي "bb" أمانك خليك معايا متعلقش راني نعرف إلي كثرت عليك.. تفكر يا قطعة مني فماش مرة في حاجة بخلت عليك..تفكر حتى وقت إلي خبيت علية حاجات وخاب ظني فيك.. تفكر وقلي وقتها ...سلمتش فيك ؟؟!! ..علاش علية تبدلت !! و آرميت كل اللي بيناتنا وآغبرت؟؟ علاش في لحظة تنكرت..وعلية تكبرت؟؟ هذا كفويا ..خاطرني بيك كابرت وفي غيرك ما خممت..!! هكة تجازيني وآنا حياتي غير ليك ما خيرت..؟ كان إنتي نسيت راني عمري مانجم ننسى كل لحظة وكل دقيقة عشتها ليك وبيك.. كان إنتي نسيت .. راهو قلبي إلي حبك لتوة ماهو مسلم فيك..

كان نسيت وقدرت تكمل حياتك مع غيري قلي .. خليني ندفن قلبي إلي مارجني عليك..كان لكل ما كان بينا إنتي نسيت !! تنجم توة تحل عينيك ..خليني نشيع جنازة قلبي إلي كان يعيش كان بيك