أيجا نحكيلك حاجة ؟ وقولي جربت ولا ؟ نتخيلك راك جربت آما من خوفك مناجمتش تصارح روحك منجمتش تحكي و تبوح !
جربت ؟

جربت مرة تحب تحكي و ماتنجمش ! ماتلقاش منين تبدا و باش باش توفة و شنوة باش تروي لحكاية و متالقاش حروف تنطقهم و لسانك يتلعثم و ريقك يشيح و دموعك تميل و الڨلب يوجع و العرق يسيل و المخ يتمهمش و العقل يضيع ، يشد يديك و تمعسهم و تلوج على كلمة تبدا بيها باش تحكي ؟

هذا الكل تحسو و أنتي مزلت ماحكيتش ؟ :)

جربت مرة فديت تخنقت تحب تصيح تصيح و تصيح و تصيح !

تمشي لأخر بلاصة في البحر و نسمة لبحر تحيرلك مواجعك و حصحار يجرحك لين يسلك الدم

تحب تصيح تصيح تتغصور و ماتلقاش صوت يخرج مالڨرجومة ماتلقاش نفس يخرج هاك الغصة ألي في الڨلب ؟

ماتلقاش !

تتحصر تحاول تصيح تتذكر كل شي الڨديم و الجديد الماضي و الحاضر وكل حاجة توجعك أما ماتنجمش تصيح !!!

صوتك مفاماش نحب تصيح لين لبدن يتعب لين الجفون تذبال لين عروقك تبان !

تحب تصيح أما ماتنجمش .....

جربت تخرج من بيتك تحب تقعد وسط العايلة تحس روحك ماكش مرتاحة و ماكش منهم و ماكش نفس طباعهم ؟

ستانست بالبيت الي فاهمتك تشكيلها و ترا سرك ؟

جربت تخرج مع عباد تقول عليهم أصحابك

أما أنتي تبدا معاهم كان بدن جهامة و المخ سارح هايم في أوهامو في حلماتو في وجيعتو تحس روحك مش موجود معاهم !!

تحس روحك مذابيك تقوم تجري تروح لبيتك و ترتاح على الجوجمة و على الحس الي داير بيك ؟؟

تبدا معاهم تسمع شطر و شطر لاخر ماكش معاهم و من شيرة من داخل تضحك عليهم خاطرهم ينافقو في بعضهم و يكذبو على بعضهم ؟

و كل واحد يهز لقفة للاخر ؟ تبدا معاهم جيست تحب تبدل جو أما انتي زدت على مابيك و تكويت في عينيك ؟؟

جربت مرة شتهيت حاجة حبيتها و شهوتك زادتك أما مخذيتهاش !

خاطر ضروفك ماتسمحش و مزانيتك ماتوصلكش باش تشريها ؟

جربت شتهيت تاكل حاجة أما ماكليتهاش خاطر ماعندكش فلوس ؟

جربت اصحابك يكبشو فيك كالبرد يقولوك هيا اخرج معانا اما انتي تلفهم خاطر معاندكش فلوس و ضروفك على قدها ؟

جربتو الاحساس كي يضحكو عليك خاطرك ماتخرجش معاهم و يقلولك كبي و انتي تقبلها خاطرهم مايعرفوش ضروفك ؟

تروح تبكي الدمعة سايلة على الخد ممايلة أما ماعندك ماتعمل ! في دنيا غير دنتك

جربت شرهت تشري روبة لبسة صباط مريول سروال شقاشق تحب تبدل أما ظروفك ماتسمحش باش تشري ؟؟؟

تلبس الي يجي اما الناس يضحكو عليك كيفاه لبسة تلبسها جمعة ؟

كيفكيف تبلعها غصص خاطر ظروفك ماتسمحش ؟؟؟؟؟

جربت مرة تحس تحب يكون عندك حد !

مش حد أخت !

اي أخت تعنقها و تبكي عندها تواسيك و تواسيها تلعبو مع بعضكم تلبسو مع بعضكم تتعاركو و ترجعو لبعضكم المهم عندك ءخت حتى حسها يونسك في الدار خير من حس ساكت من صباح

لليل لا حس و لا خبر و لا دقديقت الباب و لا من حد دز عليك باب الدار ..

تمنيت مرة يكون عندك حد ؟

ٱنسان يسأل عليك يحميك و يواسيك يتفقدك يتوحشك يخاف عليك من دڨة الشوكة وقت الغصة مايخليكش تحتاج الحد هو الي يخرجك من محنتك هو الي يفرحك و يزهيك هو الي يعيشك في دنيا غير دنتك يخرج مالهم و الوحدة ..

جربت تحب حد و ماهوش ليك تغير عليه أما هو مش ليك تحبو لدرجة تفرح و طير الي قلبك حيا !

أما هو ماهوش ليك ؟

ماهوش كاتبلك اما كاتب باش تحبو و تعشقو ..

جربت تحس روحك مقلقا الناس بلي انتي ماكش موجودة معاهم ماعندكش بلاصة معاهم ؟

تحس روحك انفيزيبل مايراوكش كي تبدا معاهم كي بيك كي بلاش كي حضورك كي غيابك تبدا تصيح في وصتهم بسكات لا حد يسمعك فاش تقول تحكي وقتها لروحك و تلوم شبيني مانيش كيفهم !!