جربتش مرة

Ghada Jlassi - غادة الجلاصي

جربتش مرة ترقد جيعان..

كرشك فارغة وقلبك مليان..

في عز الشتاء متلقا باش تتغطا ترقد بردان..

والدمعة على على خدك تجري جريان..

جربت مرة كي تخرج للحومة في لعيد..

تلقا صحابك لكل لابسين دبش جديد..

تقلهم أني دبشي باش نلبسوا لعشية..

باش نخرج أني وبابا و باش ياخولي هدية..

هوما يعرفوا ألي أنت تكذب أما يصدقوك..

على خاطر في قلبك مايحبوش يوجعوك..

جربتش حشمت تمد لمجتك قدام الصغار..

خاطر لمجتك قدام لمجتهم تعمل لعار..

جربتش مرة شتهيت حاجة في (vetrina) ومانجمتش تاخوها..

ومن غدوة تجي صاحبتك لابستها على خاطر هي تدلل على بوها..

جربتش مرة الناس يحقروك..

على خاطرك زوالي ومعندكش.. يهزوك ويحطوك..

بغزراتهم يعذبوك..

الناس لكل تطفيك..

على خاطر بكل بساطة مكش لاباس عليك..

جربتش مرة خدمت خدمة وفيها تذليت..

راسك وطيت..

خاطر كان باش تتكلم يطردوك..

وفي ليام لخدمتهم مش باش يخلصوك..

جربتش مرة تبكي مالقهر..

قد ماحاولت تسكت وباقي دموعك تهر..

في قلبك حاجة تحرق فيك..

والنار باش تخرج من عينيك..

كان نتوما ماجربتوش..

ومن كاس الذل ماشربتوش..

عالأقل ما توليوش كي لعباد الي مايحسوش.

لعباد الي مايرحموش..

بقلم غادة الجلاصي