تُوجَعْ..

Wiem Hbaieb - وئام حبيّب

ساعات نتمنى لوكان عرفتك بكري..

قبل برشا...

يمكن من صغرك...

و يمكن من أول خطواتك..

تمنيت عرفتك أول ما فهمت الدنيا.

تمنيت لوكان كبرت معاك..

في أحضانك ولا يدي في يدك...

تمنيت نكون أول طفلة عنقتك..

أول طفلة تخبات عندك..

أول طفلة شدت يدك...

تمنيت نخطفك ليا وحدي...

كان أنا نشم ريحتك و كان أنا نعبد ضحكتك

و كان أنا نموت في غزرة عينيك...

تمنيت نكون أول من سمعك و سمعتو كلمة نحبك..

أول من يتسلط عليك و يكرهك في روحك...

أول طفلة بغزرة دلال ولا بكلمة حلوة تغلبك..

أول طفلة تغنيلك تحت ضو القمرة...

أول طفلة تنسنس عليك...

و أول طفلة تعرف خطواتك الكل...

تمنيت نكون أول طفلة توكلك... ..

أول طفلة تاقف معاك في الكوجينة و تصنفلك...

تمنيت...

خاطر كي تحضر لحظة دفنها الزمان في صدرو.. وجيعتي تكبر...

كي نتفكر الي نهار كنت ليها و ليلة سهرت على سواد عينيها..

وقت يحكيلي البحر عليك كي شديت يديها..

كي لعبت بظفايرها و كي عشقت وشمة كتفها..

نحس دموعي تغلبني... تجري تهرب مني...

نحبك...

انت معايا.. و منيش أول طفلة أما الأخرة..

أما تقعد الحكاية حتى و انت ناسيها..

وجيعة في القلب أقوى مني..

بقلم وئام حبيّب