مَتَعْبِتْنِيش الدِّنيا أمّا تَعْبِتْنِي العْباد ... مانعرفش علاش مع كُل يُوم يِتعَدَّى يزِيد بينا الفْسَاد...

في كُل يُوم، كل عْشِيّة، وكل صباح،... كذب و غدر وعرك ونفاق

ضَلْمُوني  أقرب الناّس ، قُلْت علاقتي بِهُم هي الغلطة بِالأساس ،قُلْت غُدْوة نَعرف غِيرهم ويكون هاكا حدّ  البَاسْ ،

لْقِيت رُوحي عايشة في غابة كبيرة ،العاقل يَعْفسُوا علِيه و اليِدّ الحارَّة تِتْباس ...

كل مرة نْكَبَّر قَلْبي ، كُل مَرَّة نُسْكت ونْعَدِّي ،أمّا فاض الكَاس..

النّاس إلِّي طُول عمري شَفَّافَة و صَادْقَة معَاهُم، في كُل يُوم و كل حْكَاية يِكْذبُوا علِيَّ كِذْبَة لا عندها رَاس ولا سَاس..

هاذاك علاش نِتْمنَّى نرْجَع صغيرة و لا نِكْبِرْ في يُوم ونْعيش هالإحساسْ

ساعات نِتْسَائِل زعْمَة الأسْهل اِنِّي نْزِيد نُصْبُر ونِتْحَمِّل ولاّ اني نِكْذِب كيفْهُم ونْوَلِّي وَحْدَة مِنهُم ونِرتاحْ..

نِتمنَّى نرجع صغيرة ولا نْشُوف هَالتَّصْوِيرَة !!

ناس في وجْهِك تِفْرِشْ الوَرْد وتْغُمِّك بِالكِذْب وفي ضَهْرِك تَعْمِلكْ تَسْطِيرَة ..

نِتمنَّى إلِّي عِشْتُ يْكُون حِلْمَة وَلاَّ مْنَامَة قْصِيرة..

نِتمنَّى نْرَجَّعْ الزّمان بالتّْوالِي ونِرجع طُفْلَة صْغيرة

طُفْلَة ماتِكْبِرْش و تْشُوف قلُوب اصحابها مليَانَة حِقْد وغِيرَة

طُفْلَة ما تعِيشِشْ وِسْط نَاس وجُوهَّا خدَّاعَة وحسَابَاتهم كْبِيرَة

طُفْلَة مَيْهِمْهَاش في كلام صَالحة ولا عِلْجِيَّة و لاَ سَميرة..

على خاطر الصّغارْ يْعَدِّيِوْ حياتْهُم يِجْرِيوْ ،يَلْعبُوا، يِتْسابقُوا

والكبار يْعَدِّيوْ حياتهم يِكْذبُوا،ويْخُونوا وينَافْقُوا

على خاطر  الصّغارْ هُوما البَراءََة، هُوما البَسْمَة، هوُما الفَرْحة ،هُوما النِّسْمَة

نحلم لُوكَان عُمري لاَ رِيت كْبَار ولا عِشْت كبِيرَة...

نحلم نعاوِد طُفُولْتِي ... نحلم نرجع صغيرة...