هذه جنسية كل انسان تولد في تراب هالبلاد العزيزة وعاش فيها الحلو والمر..ضحك وبكى وطاح وعاود قام على ساقيه..تونس بلاد الفرحة والخير بلاد النكتة في قفلة الصباط..بلادنا بلاد مضيافة نفرحو بالناس الكل مهما كانت اطيافهم وألوانهم..

بين البارح واليوم عشنا برشة هموم برشة غصرات ؛ بعد الثورة إلي صارت وخرجنا فيها يد وحدة الناس الكل..صحنا جرينا وفرغنا قلوبنا تقلبت الامور وبعدنا وكل واحد يقعد يحسبها قبل ما يمد يدو واسلم عليك..ماعادش نعقل بلادي قسمونا وفرقونا وولاو يتزايدوا علينا كل واحد وحزبو وكل واحد ومشرعوا أما المؤكد ولا واحد فيهم عندو مشروع لتونس الكل لينا الناس الكل متجمعين

في هالوطن الغالي..

من وجوه الناس إلي تراهم كل يوم وانت ماشي تخدم وإلا ماشي تقرا تفهم إلي فما حاجة مش كيف ما قبل تنجم ترا الخوف في عينيهم أما مش خوف على رواحهم خوف على مستقبل اولادهم وبلغة أخرى مستقبل البلاد !!! الخوف من غدوة.. وقت ما توصل يد تونسي تقتل تونسي آخر في عز نهار من غير حتى مبرر وقتها قلبك يزيد يوجعك وتزيد تتفكر وين كنا وفين صبحنا ! المبرر الوحيد لهالمجرمين إلي هوما غرروا بيهم ولعبوا بيهم وزينولهم طريق الغدر والقتل وهاذم هوما نفسهم إلي قسمونا وفرقونا؛ و باش نحاربوهم لازمنا نتعلمو نفكّروا ، نخمّموا ، نثورو على الواقع و ما نركعوش لكل حاجة من شأنها تحبسنا و تسكّر علينا ، لكل حاجة من شأنها تعزلنا ع الدّنيا و تنسّينا الّي لازمنا نعيشو ، و كيفاش نعيشو ، لازمنا نتعلمو نشكّوا في كل حاجة ، نسألوا و نتعلمو ، نناقشو أي فكرو و ما نقبلو شيء كيف ما هو..

تونس قوية وتقعد ديما عزيزة وغالية، وأنا عندي ثقة في الخالق، وإيماني قوي إلي غدوه باش يكون خير وأحلى..لازم نحلموا باش نرجعو يد وحده كيف قبل إي عاد شبيه الأحلام الما مايجي نهار وتتحقق وأهم حاجة "الأمل" إينعم الأمل في كل تونسي وتونسيت باش يخدموا البلاد هذي ويرجعولها صورتها القديمة نفرحو لبعضنا، نواسيو بعضنا، و ناقفو مع بعضنا في الغصرات قبل الأفراح والمناسبات ^^ باش يجي نهار وتشرق شمسك يا تونس على شباب متوازن ومتعلم ومكافح ومتضامن ..غدوه ما فماش خوف على اولادنا هذاكة علاش لازم نزرعو فيهم الأمل في نهار جديد لازم يتعلموا حب الوطن قبل كل شيء، الوطن عندو حق علينا قبل مانطالبو بحقوقنا هذا مساجي لكل تونسي وتونسيت ؛