مرا حلوّة مزيانة.. إيه هكّاكة نراها أنا.. كلّها رقّة وفيانة... يديها مخضّبة بالحنّة وعليها نقيشتها.. تونس الوشمة الزرقاء والعين الواسعة العسليّة الكحلة الزرقاء الخضراااء على كل لون يا كريمة..

تونس الضحكة الصافية ومبسم الجوهر المرصّع... تونس الملية والتخليلة.. والحرام والحزام واللحفة ...الفوطة والبلوزة والحايك والسفساري... تونس الجاوي والبخور يعجعج والصلاة والسلام على سيدي الرسول...

تونس الزغاريط عاملة مسدّ والغناء بأعلى صوت وعاملة مغناني. تونس الآذان على الفجاري ويبدأ النهار بيا ربّي توكلت عليك والشدّة فيك ورزقي منك والحمد ليك..

تونس المسك والعنبر والفلّ والياسمين ما يغيبوا على دار .. تونس ماء الورد والعطرشيّة والزهر .. من عند ربّي.. تونس المواسم والأعياد وكل فرحة عندها ما يميزها هذا حلو العيد وهذه عصيدة المولد وهذا كسكسي نقفلوا بيه العام وملوخيّة تخضّر العام الجديد.. وطهورات ليلة السبعة والعشرين وخطبة وهديّة وفرصة باش نفرحوا شويّة..
تونس ما يواتيهاش السواد ولا حتى لون الرماد هي خضراء بهيّة زرقاء بلون السماء وبيضاء ببياض قلب إمّاليها.. تونس ما يليق عليها كان الزهو والطرب والضحكة من الوريد للوريد وكان ثمّة زيادة في الجوّ تزيد..

تونس مسلمة عربيّة قلب وقالب وما تلبس كان اللي يواتيها وما تلبّس ولادها كان من صنع يديها - لو كان جاء ليديها -

تونس أمّ الكلّ الغني والزوالي الشباب والشين والشايب والصغير الكلّ تتمناهم في خير الخير

تونس تدعي للهادي ربّي يسعده ويهنيّه والشقي إن شاء الله ربّي يهديه

تونس صــــــــــــابرة متحمّلة بالعقل والرصانة متجمّلة هي كيف البحر لا تزيها نقطة ولا تنقصها نقطة كيما بناووها الجدود قعدت متصلبة رامية عروقها رافعة راسها شامخة تتحدى حاطّة ولادها تحت جناحها تقول أنا اللبّة إلّي تخبيهم..

وقداااااااااااش باش نحكي وقداش باش نوصف تونس المزيانة

الريق يشيح والكلام ما يوفاش على تونس اللي تونس كلّ الناس

ما نلقى ما نقول كان " نحبّك يا تونس