تكذب و تقول فرحانة

Marwa Mhedhbi - مروى مهذبي

مش هذا الي تمناته و لا هذا الي حلمت بيه

محبتش تعيش هكا

كل يوم تقول غدوة خير

عمرها عشرين حلمت بالقلب الكبير و الدار الواسعة

حلمت بيد تمسح الدموع و حنية تذوب منها القلوب

حلمت بالعيشة الهنية لا هموم و لا بلية

حلمت...و فاقت

تلقى روحها غرقت في الاوهام

حلمت بحب كيف الي قراته في روايات و تفرجت عليه في افلام

حلمت بدنيا كلها ورود و ما لقات كان الشوك

فاقت...

لقات روحها مع زوز صغار كان مش هوما راي انتحرت من هاك العام

لقات روحها مشنوقة بين الخدمة و الدار

تطلب تفرهيدة و الا خرجة تسمع ''ملا مرجة''

لقات روحها تقول كان حاضر و الله يبارك

سمعت الكلام بلعت و غصت حتى شبعت

تسال شبيها الدنيا ظلامت و الايام دوانت

شبيه الليل طوال و الصباح التوا ما بان

تغزر للمراية و تتحسر...شبيه الوجه كحال و العينين ذبالت

حلمت بفرحة تصغرها...تلقى الشيب غدرها

مازالت صغيرة شنية الي كبرها؟

كبرها الهم و التخمام

استنات بش تتفرهد و تعيش

استنات الي يهزها من دنيا لدنيا اخرى

في بالها بش يطلعها درجة زاد هبطها الف درجة

في بالها بش يعاونها زاد رهنها...

يسالوها شبيك ذبلانة؟

تكذب و تقول فرحانة...

بقلم مروى المهذبي