ترهويجة

Amel Trabelsi - آمال طرابلسي

برشا هي الحاجات إلي تنرفزني .. تنطقني .. تجهلني .. و ترجعني ..

توجع الضحكة الباردة ... كي نضحكها وأنا فادة ...

نبلحق في المرايا حايرة .. هازة الحمل و ساكتة ..

العنين حمر و طايحة .. مالتعب.. مالسهر ..و النوم و العين باكية..

خيالي في المرايا يقلقني.. نقلبها .. ونقلها إبعدني ..

بالك الحيوط تفرهدني ..

أبيض .. صافي .. أما بلاصة الكواترو ما عجبتني ..

كنت باش نقوم نبدلو .. الجراية جبدتني ..

ضحكت عليا مرايتي .. و تشمتت فيا كي قالت تجرب تقلب الحيوط كيما قلبتني ...

كي سمعتها ضحكتني...

نتفكر إلي القهوة عالغاز .. إستسمحت جرايتي باش ما ترجعني ..

ركشت في فرشي ... والقهيوة ريحتها هبلتني .. كي ذقتها سخونة حرقتني ..

الموزيكا ما عجبتني .. برشا صياح مهمشتني ..

شديت الستيلو .. نعرف إلي لكتيبة ديما مفرحتني ..

ورقة بيضة ما نفعتني .. حسيتها هي إلي كتبتني ..

أنا في تركينتي مستكوزيا.. و نملة في التركينة لي مقابلتني ..

خايفة .. تزرب .. تمشي و تجي وترتني ..

قلت نقتلها بالك بموتها رتحتني ..

وإلا خليها تعيش أش ذنبها لعزى غاضتني ...

بالك كي تموت قدام ربها تقول هذي لقتلتني ..

و أنا مش ناقصة ذنوب .. خليها أيكا مونستني ..

البيت كبيرة تهزها كيما هزتني ..

رمشت عيني ما لقيتها ..

حتى نمالتي ..مشات و حقرتني

عيطلها ما جاوبتني.. ضحكت ما نعرفش عليها و إلا على روحي هي لي ضحكتني...

تخلبيز و تخلويض في مخي و أفكار زادت شوشتني ..

غموض و التصويرة فلو قدامي كي ركزت عيني وجعتني ...

تخمامي صحيح وإلا أفكاري غلطتني ..

كاسي فرغ ما حسيتش بيها القهوة .. زعمة أنا شربتها و إلا هي شربتني ..

في مخي حكايات و أسامي غنايات و القهوة لي وفات

أما التناقضات هي لي جوجمتني ...

بلاصة المنقالة في الحيط مش عاجبتني ...

أما تبسمت كي في الوقت فكرتني ..

نحس المنقالة رمزة .. ورغم بلادتها لازمتني ..

هي لي كل صباح مارجتني ..

ومن عز نومتي مفيقتني ...

نعديلها خاطر مساعدتني ..

مانحبش نكون كيفها نستحقوها.. ونقولو عليها فدتني ..

ما نحبش نتعلق في الحيوط .. في اليدين .. العين تغزر و الكلمة خانقتني ...

برشا هداري في راسي ساكنتني ..

كان العروق تشيح تبقى حروفي معيشتني ...

طوالت ليامات تعبتني.. و الليلة الأفكار الكل إغتصبتني...

خذات فيا باي و رهوجتني ...

هزان و نفظان كلامي .. مش لازم تفهم يكفي لي الورقة فاهمتني ..

وفات كي يدي مالكتيبة وجعتني ...

آمال طرابلسي

Website Design Brisbane