جاني نهار قالي هيا تجي نلعبوا لعبة..هيا تجي تحبني ونحبك اليوم ؟ وغدوة كل واحد يمشي في حال سبيلو تنساني وننساك كأنو لا نهار عرفتني ولا نهار عرفتك..قتلو علاه ؟!!

قالي إنت انسانة موش عادية وانا إنسان موش عادي ما نجمش نخليك تتعدى في حياتي هكاكة وخصوصا أنا ما نمنش بالحب أنا كاتب نتخيل ونصنع في الحب من ورق وكل قصة نوجهها ونتحكم فيها بقلمي..والحاجات إلي محروم منها ومنجمش نعيشها نتخيلها أنا إنسان غير سعيد أعيش بخيالي في هذا الواقع المرير..

قتلو مالا علاه متتخيلش إلي إنت تحبني ونحبك وفك علينا من ها اللعبة إلي مش مضمونة نتيجتها ؟!

قالي ماو غادي المشكلة وين منحبش نتخيلك إنت الوحيدة إلي نحب نتشارك معاها الواقع حتى نهار واحد.. و زيد شخصيتك ما تخليش الواحد يتخيل وإلا يستبق تصرفاتها !..هي لعبة هيا شقلت ؟..

وافقت وكان الرهان إلي يغرق الأول وينسى قواعد اللعبة هو الخاسر..وافقت خاطر أنا تستهويني المغامرات وبالنسبة ليا الحياة إما أن تكون مغامرة جريئة أو تكون مملة و باردة و ما فيهاش روح..ما خممتش في العواقب وكانت ثيقتي في روحي أكثر حاجة تحفز فيا باش نخوض ها التجربة... يتبع