تجي ؟

Raja Ben Mabrouk - رجاء بن مبروك

تجي ؟

نفركوا هالرمانة

و نفڨعوا هالدمالة اللي ماشية و تكبر ؟

تجي

نتڨابلوا راس راس

العين في العين

و تجاوبني من غير ما تغمني ؟

خلينا مالبوس و التعنيڨ

موش وڨتوا

ناس ڨبل ڨالوا و كلامهم موزون يا نور العيون

اللي بوسة ترضيه لا خير فيه ؟!

تجي ؟

تواجهني

بحڨيڨتي

ڨلي يا بنت الناس

راك في عينيا **** تي هذيكا هيا !

ڨلي راو تخمامي فيك ما تعداش ليلة حمراء و الا كحلة ك سعدك المسود

و اللي مع الأيام ماشي و يغماڨ

تجي ؟

توضحلي و تحكيلي !

ڨالولي راو حاطك جوكر في حياتوا

وڨت يڨلڨ يجيك

يعدي معاك ليلة و يڨوم الصباح ينفضك و يغيب

ڨالولي راو بايعك و موش شاريك

و حتى كان جهامتوا معاك الروح و العڨل موش فيك

و برا كاتبين الصداڨ

ورقة عرفي بشهود و قيد على الإشهار و السنة و دارنا و دارهم فيبالهم و خرافة من خرافات عبد العزيز العروي

و اش الفايدة يا عزيز ڨلبي ك نكون مرتك عالكواغط و في ڨلبك هي ؟

تي بالله العظيم هذا هو العهر و هذا هو الزنا المحلل