تبدلت .. تبدلت عليا برشا ، موش انت الي توا عندي سنين نعرفو  و موش انت الانسان الي حبيتو ...

منعرش شنوا صار معاك و منعرش زادا شنوا الي بدلك من ناحيتي .. اما نعرف الي انا حبيت البعد  و انا الي خلينا كل واحد على روحو . و نعرف ما عطيتك حتى سبب مقنع ...

نتفكر كلامي مليح كيما نتفكر مليح انت شنوا جاوبتني كلماتك قعدو محفورين في مخي قتلي " نستاهل خاطر حبيتك تقلي نبعد عليك ..." قتلي "انت خترت و نوعدك هذا اخر كلام تسمعو مني "  و كانت اخر كلمة سمعتها منك "نحبك "

ندمت حبيت نصلح غلطتي حبيت نقلك لا راني نحبك ما تمشيش اما فات الفوت و انت مع غيري مشيت .

مبروك عليك انشاء الله تفرح معاها . مانيش مش نلومك يزي ما لمتك اعوام و سنين .

نتفكر كلامك  ما كنتش برشا تقلي كلام حلو شخلاني كي نسمع الكلمة منك ندخل بعضي و نعرش نجاوب .. و انت تبقى تضحك عليا و تقلي يا بنتي تعلم شوية رومنسيا

تتفكر وقت الي جيت باش تراني  تتفكر قداش ضحكت عليا قتلي " وجهك و الجيب الي لابستو ياسر وتاك " قتلي " شبيك خفت و دخلت بعضك ما تخافش انا معاك " و نهارتها عديناها ليلة كاملة و احنا نحكيو عينك ما فارقتش عيني . و انا مرة نخزرلك و مرة نخزر للصغار الي يلعبو تتغشش و تقلي عاجبك الوليد .. نضحك و نقلك يا مغيار و انت تقلي لا مانيش مغيار و نبقاو هكاكة نتعاركو كي لوليدات الصغار . انت هاك نسيت و انا منجمتش ننسى

منجمتش ننسى اخر مرة شفتك فيها انت كنت عارف الي هذيك المرة الاخيرة كنت تقلي خليني نشبع منك مانيش مسيبك تروح ليوم .. يمكن من ليوم معادش نراك . تقلي خليني نودعك بالقدا و انا مانيش فاهمة . ماشي في بالي خاطر راجع تخدم ما جاش لبالي لحكاية اكبر .

ما جاش لبالي  ال صباح طلع و الحلمة وفات ... وفات اي وفات .. حتى كان انت ما خنتنيش و حتى كان بدلتنيش ممكن احساسي صحيح .

اما حبنا ماهوش باش يعيش ......