نتفكر ، نتفكر كل شي بdetails ، ليلة كيما اليوم ضلام ، ضلامها مش عادي ، سوادها غامق عمري ما ريتو ، تقول أمنا الغوله راقدة فوق السحاب ، حتى القمرة خايفة ومتخبية ، لا نورها ضاوي لا وجها ضاهر ؛ نتفكر ، مطر تجبد خيطين من سما ، ليلتها ربي عطا خيرو ، أما حسيتها نقمة مش نعمة ، حتى ريحة التراب مش كي العادة ، زفرة ، تخنق ، جيفة كينها حيرت ريحة الموتة تحت التراب ..

انا خوافة أما نهارتها ،ما نعرفش شصارلي ، لميت دبشي ، في صرة ، تي إلي خلطت لميتو ، بش ما نجبدش الفليجه من فوق الغلس ونفيقهم ، خواتي ، بابا أمي كلهم راقدين ، كان انا ستنيتهم رقدوا بش نفيق ، ليلتها قلت يزي ، يزيني من كل شي..

"احكيلي أمي ، نحب نعرف حكايتك ، عينيك تلمع فما حاجة تحب تخرج منهم "

بابا بطلني مالقراية وانا عمري 8 سنين ، ملي جيتو بالكرني بش نوريه إلي انا جيت لولا ، ستنيتو بش يقلي صحيت بنتي اكاك نحبك ، قلي لوح الصفا ونحي أكا الكازي إلي لابستها وبرى للكوجينة عاون أمك

يا بابا راني لولا قتلك يخي ما سمعتنش ؟ قتلك برى للكوجينة , محسوب هدره ، ندادك يجيبوا فالفلوس وإنت لاهيتلي بالحكايات الفارغه , "باهي هاني مشيت للكوجينة" ،" يراني حزينة" ، لطخت لكرطابة والكرني ومشيت ، " يا أمي شبيه بابا ، علاش كان انا كي ننجح ما يفرحش "" تو كي تكبر تعرف" ، أمي تخب ف دموعها ، كي نغلب عليها بالاسئلة ، تقلي بنيتي لي وليك ربي ، انا بيدي مغلوبة على أمري ، ديمة صبر روحك كيفي وقول كل قوي فوق منو قوي " .
بطلتها القراية ، كليت طرايح نباشت القبور ، لحمي زراق ، بدني كلو معلم ، شعري تقطع ، دمي سال ، دبشي تقطع ، ساعات نتحصر فالبيت كيما الجربوع ، أختي الصغيرة بسرقة ترميلي قدمة خبز شايحة مالشباك

نبات ليالي مني للزليز ، في عز الشتا ، سقف يقطر عليا

ماو أمي قتلي ديمة قول كل قوي فوق منو قوي ، هاني نقول ! لا باب تحل لا جاني فطور ، لا بدني برى ، شنعمل يا ربي

نهار من نهارات الكرفي ، انا نطيب ف التاي في وسط الدار ونسمع فيهم يحكيو فالسقيفه ، "يا مرا شقولك كان نعطيو بنتك لكبيرة للمنجي " " وه يا غلبتي ! منجي إلي عمرو 70 بش تعطيه بنت 11 " " إي شبيه ، تو تكبر عندو وتتربى على يديه ، وزيد مالفوق راجل لاباس بيه ، يعطينا تفتوفة نغدو بيها الدار إلي بش تطيح علينا " " بش تبيعها معناها ؟ " "أيا سكر فمك ، انا الغالط لي نسأل فيك " , عرفتها مزبلة على راسي ، مادام حكى رهو بش يعمل ، ما لقيتهم كان قالولي راك نهار الفلاني بش تعرس ، حاضر روحك ، هههه كفه بش نحضر روحي بربي ! كفه تحبو طفلة مازلت حتى ما بلغتش تحضر روحها ، حسيت روحي بديت نسلم في أمري لربي ، هو ذل هوني هو ذل غادي ، شمزال الراجل أيام ويموت بلكشي يفرجها ربي ، ناس تدربك وتغني ، لبسوني كسوة الحنة توزن 100 كيلو ، أيا قلنا ميسالش مش أرزن مالجبال فوق كتافي..
قالولي تجلى ، قتلهم ما تورينش كيفاه انا أصلاً نمشي على النار ، تو نتحرك وحدي ، وقعدت ندور في قرارة كيما تقول مماتي ، كل ميلة معها دمعة تهبط تضرب الزليز حسها من دون الناس الكل نسمعو كان انا

، يزيد يغيظني حالي نزيد نبكي ، كلهم بكاو إي ، سخفتهم طفلة صغيرة تبكي على فراق أمها وبوها وخواتها ، كان أمي فهمتني علاش نبكي ،الوحيدة إلي دموعها جاوبوا دموعي ،" مش قتلي يا أمي ادعي تو ربي ما يخليهاش بيك ! هاني غدوة بش نمشي لدار واحد قد جدي ونبات في فرشو ، هاني ما تنصرتش ، شنية نعمل تو ؟؟ "، أمي ما تجاوبش معادش عندها ما تجاوب ..

، "اش يعمل يا بنيتي الميت قدام غاسلوا" ، "اش خص يا أمي كان جيت بقلبك وطاوعتني كي قداه من مرة نقولك هيا لم شعندك ونهربو ونهزو خواتي ، أرض ربي كبيرة و إلي خلق ما يضيع ، هيا نمشيو ، أما إنت ما حبيتش إنت خفت و خوفتني ".. فرغت الدار ناس الكل شدو بلايصهم ، كلهم رقدوا كان انا عيني محلولة وجامدة في بلاصتها ما تتحركش ، اش بش يصير فيا زعمة ، نموت عندو من أول نهار ولا نموت عندو كل يوم ، شكون بش يعطيني كتفوا ، حتى حد .. اه يا ربي ما عند كان انتي ، قلي شنعمل دلني

لقيت روحي كان فالشارع هازه طرف دبش ونجري ونبكي ، خايفة وحايرة وكل شي جاني مع بعضو ، زعمة وين بش نمشي وين بش نشب اش باش يصير فيا ، أول مرة نخرج وحدي أول مرة نخرج فالليل .. شديت ثنية طويلة لا عمري تعديت منها ، ما غزرتش ورايا ، سرحت في ملك ربي ، تمنيت كان هزيت معايا أمي وخواتي صغار إلي بش يعيشوا لعذاب متاعي ، كل يوم نتفكرهم ، نتمنى نراهم نمسهم ونشمهم

"ماما ، ياخي من نهارتها ما رجعتش ! ما ريتهمش ملي عمرك 11 سنة ؟؟ " " ما نجمتش نرجع ، كان نمد وجهي نموت ، نتدفن بالحيا"

من نهرتها مشيت وما رجعتش ، خفت ،حتى كي لقيت روحي مشيت وشفت حياتي بعيد وانا صغيرة في وسط لكبار ، وحتى كي كساح قلبي ، مازلت كي نتفكر البلاصة إذيكة نخاف ..

نخاف مالخوف إلي عشتوا غادي ، نخاف ماليالي السود ، نخاف من وجوه الناس ، نخاف من صوت الريح ، نخاف مالغزرات .. خفت و لقيت روحي مازلت ما نجمش نكون أقوى من هذا كل ونرجع ، أما ما نحبكش كيفي ، ما نحبكش تخاف

بنتي ، نحبك قوية ، ما نحب حد يحطك تحت رحمتو .. ما كبير كان ربي ، و الباقي كيف كيف ..

بقلم يسرى عز الديني