طلبت من ربي و دعيت يرجعك ليا , صليت و تمنيت ... , اما ظاهرلي ضيعت الثنية .. انا اللي نستنی فيك راهو موش هي.. انا اللي ياما قاسيت و ما شكيت .. انا اللي ياما بكيت و ما حكيت.. انا اللي و انا  نستنی عمري ضيعت..

ناجيتك في ليالي طوال تجيني و تواسيني و تمسحلي دمعة عيني ..

حسدوني فيك كي حكيت علينا .. قالولي غدوة يخليك كرهتهم و في قلبي قلت اللطف اللطف و ربي يبعد الحساد علينا ... غدوة تشوفونا عرايس و الفرحة تلمع في عينينا .. و حبنا اللي غرتوا منو يكون كالشمعة اللي تضوي علينا ليالينا...

اليوم انت مشيت و الحلمة البنينة هزيت .. الضحكة المزيانة محيت .. وعدك اللي تحديت بيه الحساد ما وفيت ...

من بعدك ذلوني.. تعبوني .. جرحوني .. حكيتلهم اسراري باعوني .. شكيتلهم همي ما سمعوني... من بعدك من العيشة مليت , علی الناس قسيت .. الدنيا الي حبيتها كي حبيتك كرهتها كي ودعتك.

بلاصتك فارغة .. قلبي يناديك باش يعيش .. نستناك ليالي و ايام و شهور و سنين و لو ما تجيش .. نخترعك في خيالي و بيك نحيا و نعيش ..