ليوم بعد سته سنين ملي مشى وغاب وموش بيديه ولا بيدينا .. مات ... ليوم عيد ميلادو لي كان يعمل فيه 27 سنه ..

وكيما كل عام منسيتش عيد ميلادو ! أما السنه موش كيف السته سنين ملي مشى, عودتو كل عام نشعلو شمعه في الليل ونغنيلو وانا نعرف الي يرى فيا , السنه نسيت محبتنا لي كانت خاطر خترت وبديت حياتي ..

وهوا يرى فيا وفرحانلي متاكدة , السنه نقولو سامحني سيبتك تحتفل بيه وحدك في دنيا غير دنيتي وموش معايا بالك مع حورية من حوريات الجنة .. بصحتك .. ليوم وعندي 11شهر ملي بديت دنيا جديدة انتي مافيهاش وعمري محكيت عليك غير اول معرفتو .. لبارح كنت معايا وليوم انا مع غيرك وانت عند ربي ..

الدنيا سبحانك ياربي اش تبدل الاحوال.. تفكرتك كيما ديما نتفكرك وبالك كلاممي متناقض خاطر موش عارفه نكتب .. فرحانة معاه ومهنيني اما ميشبهلكش صدقني .. ميشبهلك في شي , عكسي وعكسك وحبيتو وليوم نزيد نحب فيه ..  غريبه , كان تراني كبرت زينت ورزنت وركزت اما حياتي موش منظمه مافيها شي ماشي كيما نحب وماحققت لتو شي ملي نحب .. اما هاني نرازيزتي .. عايشه قويه محلاني .. ليوم حبيت نقلك لي انتي في بلاصة متاكدة لي هيا خير من هنا ..

الله يرحمك وانشاالله كل عام تكبر فيه ربي يمحيلك ذنوب اكثر .. وانتي غادي ادعيلي ! مستحقه برشا دعاء برشااا .. ربي يرحمك ونارك طفات فيا وفي داركم وصحابك نساووك غير مروان لتو محروق عليك .. صحابك لكل نساووك .. اختك سمات ولدها عليك وامك كبرت وبوك كالعادة , خوك خذا وماعنديش اخبارو بالك عرس زادا ..

بعدت علي اخبارهم موش قلة اصل متفهمنيش بالغالط , اما يزيني ماتوجعت وخسرت وضيعت .. ليوم عندي حياتي ... في الجنه نتلقاو .. 4/12/2010 تاريخ ظلام ..

ليوم 8/11 عملت 27سنه .. كبرت كبرت .. انا مازلت في 23 اما مبعدك مخي فات ال30 , قالولي سبحانك ربي هزو وزاد اعطاك مخو ورزانتو , خذيت برشا من طبيعتك برشا ..

مازالت فيا حاجات منك وفيك .. ربي يرحمك يا اكبر شوية كبده ذقتها !