بابا تعدا اكثر من عام توة, والنار مابردتش...

الجروح مابراتش والدموع ماكفتش...

قالولي توة تنسى... ايام, شهور, سنين ومنسيتكش...

كيفاش يحبوني ننسى وجهك المزيان...

ضحكتك في الدار وقلبك اللي بالخير مليان...

كيفاش يحبوني ننسى ونتصرف كأنوا ماصار شيء...

بابا الغالي تحت التراب! وهوما يسألوا فيّ شبيك شاردة... شبيك باردة... وين مشا قلبك الحي؟!...

قلبي دفنتو مع بابا هزّوا معاه ومشا...

والجروح اللي تحلت معاش تبرا... معادش فيها دواء...

مافما شيء يرجع كيفماقبل, بعد ما بالنار تكوى...

هوما يروحوا لديارهم, يلقاوو أباتهم قاعدين... في ديارهم, في الدفاء راكشين...يحكيولهم على نهارهم وفي الدنيا شنوة عاملين... يحطوا ريوسهم عليهم كيف يبداوو متقلقين... ويضحكوا معاهم كيف يبداو شايخين... ابّاتهم في فروحاتهم حاضرين... على عروساتهم شاهدين... ثنية الدنيا مع بعضهم مكملين...

واني بابا توفّى وخلاني صبية... ألف حلمة حلمتها معاه مش باش تشوفهم عينيّا... يدّو معادش تشدّ ايديّا... ولا باش تتمد وتمسحلي دموع عينيّا...

معادش باش يفيق الصباح ويوصلني... وفالليل زادة قبل مايرقد, معادش باش يبوسني ويحملني... وفي وسط النهار معادش يكلمني... وسياقة الكرهبة مش باش يعلمني... معادش يضحكني...  معادش يعنقني... مشا وبِنار الموت حرقني...

نعرف بابا ماهوش بيديك... اما شنعمل!؟ توحشت كل حاجة فيك... انشاءالله في الجنة نخليك... انشاءالله في قبرك نهنيك... انشاءالله يقولولي يرحم والديك... الله يرحمك بابا ويضوي عليك...