اي تجي !

مرة اخرى

أسس تبعني

يدك في يدي و ساكك على كتفي ،مرة نمشيو و مرة نجريو

مرة نحملك و مرة نتكًى عليك

وصلنا اخزر محلاها دارنا

-هذي دار !! هه تي هاو كوخ

اي كوخ و كان تحب عشة زادة لمهم عشة حبنا

مش انتي تحبنا نهربو عالناس و النسناس

مش قتلي ايجا نبنو دنيا زينة في الشتاء ندفى. بيك و تدفى بيا

مش قتلي ايجا ايجا نبنيو دنيا جديدة علينا فيها انا السلطان و انتي الأميرة

شوف عشتنا مشبها فيها برشا نوار و قدامها برشا خضار ، لا فيها لا حس لا تكسير بلار ، كلها لوح مالاشجار و الريح يهبهب فيها يمين و يسار

فناجن على كل لون يا كريمة ماني نعرفك تحب الكريمة و ريحة القهوة البنينة

لا فيها لا بيت نوم و لا بيت صغار فيها كان فرش مالنعام ماك قتلي منحبش الضياف و تكسير الراس

كان انا و انتي و حبنا بالأساس

لهنا فما كان انا و انتي

فما كان حبنا و صحبتنا ،تعنيقتنا و بوستنا

فما كان خدودك المليانة و ضحكتك الرنانة

شعرك الطويل و شوافر عينيك المرسومين

حضنك و الدف الي فيه

كي تمسلي لحيتي و نذوب في حنية يديك

و قصرك كي تتشعبط بش تحملني و انا نتجبد عليك

تغضب و تذبلني عينيك ندوخ و نبوس بوسة الخال الي في كفوف يديك و نهبطلك بش تعضلي خشمي بسنيك

ريت عشتنا محلاها و مدفاها

-باهي ايجا تو  

-لا خلينا في دارنا

-تي ايجا و سكر فمك

-باهي

شوف

مش هذي حلمتنا "قهوة العشاق" كل شي فيها انتيكا لا تلفزة و لا موسيقا

فيها راديون من عام سبعين يحط فيروز في الصباح و ام كلثوم عقاب الليل

شوف تصاورنا فيها معلقين و كيفاه فاهم فرحانين

شوف فناجن القهوة الحلوين و الكتب الي على كل لون يا كريم

ايجا نعملو كيما اكا العشاق المتركنين

انتي طيبلي قهوة الصباح و انا نترشفك في الليل

ايجا عندي ايجا

-نحبك

-و انا نعشق دين والديك