ايجا

للقلب إلي حالف بيمين لغيرك لا يحن ولا يلين

للعين إلي بعدك  تعمات و لا عاد تغرها لحية ولا عرض كتافات،

للكتف إلي عليه تكيت   و هموم الدنيا رميت

لليد  إلي حلفت تشدها طول مافيك نفس

للوقت إلي من نهار مشيت حابس، كيفك هو زادا راسو يابس

للحكايات إلي ما تتحكى كان ليك ، ما تتعاش كان معاك وبيك

لسماء إلي تعبات بعدك غيوم،للنجوم ،لكلمة نحبك قبل النوم

ايجا

للتنهيدة و الليالي الوحيدة و الغزرة الشريدة

للتعنيقة البنينة اللي فيها هموم الدنيا نسينا

لكل كلمة قلتها في سكات، و ريحتك الي في جواجيا تخبات

للداء اللي من غيرك ما فيهوش دواء

لمخي اللي يقلي لا ما جاك منو كان البلاء

ايجا

للعمر الي فرحتو برجعتك فرحة  غشير بمهبة العيد الصغير ،

للكلام الليل إللي مش بالزبدة مدهون ، خاطر إلي يحب عمرو ما يخون

للناس إلي قالوا "كيف ما نساك انساه،مريض و محال دواه"

للنار إلي شاعلة لهيبة، مش كيناها طولت الغيبة !

للروح إلي تفركس فيك في كل ثنية مشيناها و في كل غناية سمعناها ،هي زادا مش مصدقة إلي الصفحة طويناها  و الرواية قبل ما تبدى  ختمناها .  

ايجاهم و ما تجينيش  :")