انت المشكلة و الهنا .. انت الهم و الراحة .. انت القهرة و الفرحة .. انت الوجيعة و النشوة .. انت الجرح و الضحكة .. انت ناري و جنتي .. انت .. انت برشا حاجات و برشا حكايات .. روايات و تفاصيل .. انت توشيشة عقاب الليل و تخنتيب حروف دوب ما تتحل العين .. انت العشير الخاين و الغشير الحنين .. انت الي تهز الفوق ساعات و تهد ايامات ..

انت داري و بلادي و عالمي و الدنيا .. و انت التفشة في عينيا .. انت الي نحلف عليك .. نغضب عليك .. ما نلوج عليك .. و ما نلقى روحي روحي كان نرضي فيك و نحب نتدلل عليك .. انت وجيعة الجواجي و راحة البال .. انت شوْيِةْ كبدتِي و دمعة فرحتي .. انت الي حروفي تبرد عليك و ما تتنظم كان عليك .. انت برشا حاجات و برشا حكايات .. انت غلطتي الكبيرة و انت الي ما نسطر مستقبلي كان بيك .. ديما تقولي يا مريضة .. مش عيب المرض .. و خاصة كيف يبدى بيك .. تعرف ؟ ساعات نرا رحمة ربي متجسدة فيك و ساعات نرا ربي باليني بيك