حاجة مالحاجات اللي نحبهم فيا ها التخميرة اللي تجيني و نبدى نحب نكتب و ما نسكتش ..

نكتب و مرة نلوح و مرة نبعث و مرة نقول شد صحيح  و وصلها و ما تتلفتش ..

نعرف روحي عايشة تخلويضة معاك..

اما محلاها كي نقوم الصباح نحب نرجع بالوقت باش نعاود حكاياتنا و ريقنا و السبة اللي عملها باش نراك..

باهي سيبني خاطر دخلت فيا و في جواجيا  سكنت..

سيبني و ارجع شدني بين ايديك و خلي الحشمه تموت و نقول انا اللي غسلتها و دفنت ..

تعرف مخي يخدم و يدور و يعاود يسرح بيا في جبال و بحور ...

مش انا المهبوله.. كان نشد روحي قدام خزرتك , عينيك وشعرك و لحيتك ..

مش انا البلبازة. كان منبداش نخزلك و نحب نبكي و نخمم نرجع الفازة  ..

ماشي بيا الشي و يزيد.. اما حاوال تعاوني باش نرجع روحي اللي جايا من بعيد

اخزرلي احكيلي حاول تفهمني في روحي اللي مش فاهمتني ..

ساعات نقول شبيني مش خايفة.. مستقوية و على روحي مش رايفة ..

ساعات نقول لا انت ضعيفة .. فيسع تتكسر و روحك رهيفة ...

انا عايشة حكاية و كي نرا روحي منعقلها في حتى مراية ..

تعرفش علاه خاطر ريتها معاك مشات و متحبش ترجع ..

البارح بكيت صحت و تغششت و من سابع سما لقاع الارض طحت ..

اما كي عنقتني سكت ..حسيت اللي انت بو الطفله الصغيرة اللي فيا ,انتا الدفا اللي داير بيا  انت الراجل اللي يخرج عليا ..

نتفكر برشا حاجات من ليله البارح اما مننساش كي قتلي "انا نحترمك  و نخاف عليك "..

كلام سمعتو قبل اما من حد يحب يلقاها سبة باش يمشي و يبعد عليك ..

انا اول مرة نحسها سبه باش تبقى معايا .. انا حسيب الخوف كان تسيبني حيست حاجة خايبة كان تمشي هذاك علاه جيتك نجري و حبيت نتخبى عندك ..

انا قلت كلام قصدتو و كلام مقصدتوش وكلام جا وحدو و محسبتوش ..

منيش باش نزيد نطول خاطر اخر كلام قلتو ماللول ..

انا نحب نكمل معاك و نفنى باش نلقك ...