سخانة .. سخانة ..سخانة , قايلة  حنانية  و انا في ثنيتي  لبو منديل  و بعد ندبّ للاسواق ..  بففف  قضيات العرس  ما توفاش  و انا كالتقازة  من بلاصة  لبلاصة  سخانة ربّي و زاد كمّل عليّا  الايشارب اللي على  راسي العرق  يجبد مع ظهري   و السخانة يا ميمتي وقفت على بياع الليموناظة خزرت للسطوش  ووه على امي قعدلي  حق الروزاطة و البخور و الباقي حقّ الكوتروات و الثريّة  ايّا مش لازم البخور محسوب العرس باش ياقف  عليه .. شربت الكويّس يا للّة اما يصوّر الخير و البركة بياع الليموناظة ربي يزيدو مباصي عليها في الشموسات

دخلت لبومنديل  البياعة يتعايطوا .. الساقط دينار قلّي لا نحّيه و بدالي بلغة : ليبيا مسكّرة , السوق كاسدة البلاد شاعلة فيها النار الله لا تربّح  الثورة هاو اش ربحنا منها كرّوا عليكم و علينا

- يا ولدي يهديك خوذ بخاطري راني عروسة الدورو يزيد فيّا

شيّ  قلّي غنّي غناية اخرى

- موش لازم توّة نزيد ندور ... ما يشبعوش من  عياطهم البركة طارت

قدّمت القدّام  امّي توصّي و تعاود  خوذ روزاطة  فستق .. اممم محسوب العباد باش تقعد متذكّرة روزاطة حنّتي بالفستق ؟

مخّي فيه برشة حاجات.:ماكياجي. .. حوايجي .. حجّامتي .. هاي الدّمالة  الحجامة و الحجامات سيدي خويا برشة انواع و برشة اسوام من 500 دينار و هذي تنجم تنحيلك  شوافرك  و الا حواجبك و تقصلك راسك مش شعرك

و زيد عندك  بونيس  تدهنك ..

و ثمة الي ب3000 دينار اه هذي تعمل كان السينيي  متاع الدوزيام شوا اهوكة تجبدلك شعرك تخليهولك في لونو العادي تعملك روز في فمك و انشاء الله مبروك ..

ايا هاني طلعتلي السخانة و اتذكرت  قفطان امّ العروسة  هذا سبر جديد زدناه من عنا انا و اخوتي ( ربي يفضلهم) توّة تبدا صبعك في عينك 10000 قضية تستنى باش تخلّصهم اما قفطان امّك تخلّصو العروسة الله يهدي إلي

سبقني.. مالا راهي في وجهي ..

-  الو اا وينك يا سخطة

- هاني توّة خارجة من الاسو اق  مروّحة لاباس

- لقيتلك حجامة باهية و مرفقة ما ركّحتها كان بالسيف قلتلها تو يقدّوا عندك اخوة العروسة الكلّ

- يعمل الله دليل

- يا بنتي راو مازالك كان 15 يوم

-  بربيّ خلّيني توّة راني  مرزّنة   و عارقة  و الشمس تنقبلي في راسي

-  باهي قاتلك امّي ما تنساش  الجاوي و الوشق  و ..

- بربي فكّ عليّا كان الحكايات الفارغة

- الو الو  .. الرقم المطلوب مغلق

- يعطك داء يا لفعة

اي سكّرت عليهم التاليفوني  الناس الكل فكّ عليا جيب اشري اشري  جيب ما تنساش  ردّ بالك تنسى .. في اللحظة هاذي قرّرت انّو الأوروبيين عندهم الحقّ يؤجّلوا عروساتهم  يزيد يحكيو مع بعضهم  و كيف واحد يقرّر باش

يعرّس  يعمل  برنامج كلّ  واحد من عايلتو و الاّ اصحابو  عندو باش و كيفاش بش يعاونو  اما احنا العروسة تكحال و تضعاف و تدوان و تهبل قبل العرس خاطر يلزمها ادّور و تعكل و دبّر راسها و خلّي عادة كي تبدا ترّ فرّ

قدّمت القدّام شويّ شفت بلاكة متنجّمش تكون enseigne) )  مكتوب عليها حجامة اكهو حسّيت حاجة كالذكير جبدتني قلت ايا هاي في العاصمة خير ملّي في حومة صحيح حوينة اما .. دخلت

- عالسلامة

- بش نسكّرو

- يا رسول الله علاه في خليقتي ردّ علي السلام عالقليلة

طلّت عليّا عزوزة تعمل 70 سنة جري شعرها الكلّو ابيض اما تحسّها مرتوبة مضخمة لابسة روبة ما احلاها كعزايز فرنسا شفاشفها غارقين مالكبر و محمّرتهم بيني و بين روحي قلت هاذي كان جات في حومتنا رام قالوا خارفة و

الاّ هاترة و الاّ فازدة يفسّد و الله عملهم ..

ايّا خزرتلي ما الفوق لللوطة و قاتلي ظاهر فيك عروسة .. انا فرحت نسخايل باين على وجهي ياخي قتلي عرفتك بالتلحيفة شنية الحالة ايشارب في هالسخانة و شوميز باليد و وجهك ازرق بالشمس اللي ساطعة في الايكرون

شي يعيّ فانا في العادة و في حالتي الطيبعية الرادسة متاعها نسبّها و الاّ في اقصى الحالت خاطر عزوزة نقلّها ربيّ يهديك اما هي ما نجّمتش نجاوبها بهتّ فيها نطرتلي من فوق راسي و قتلي خلّي شعرك يتنفّس انا معادش

نحبّ نخدم الحجامة خاطر طاح قدرها و زيد يدّي خانتني شويّة حمد الله عندي فلوس يرحم من خلّى انا نعيش وحدي و ربّي مانابش بالصغار هو كي تجي تشوف خير انا قلوقية و نتنرفز فيسع ... ايّا اش تحبّ انت اوّل  مرّة نتكلّم

هكّة ماللي مات راجلي ..

خزرتلها .. قلتلها انا مازالي 15 يوم على عرسي عندي زوز دورو يلزم يززيوني للحجامة و ما ..

ما كمّلتش كلامي قتلي طلّ عليّا نهار عرسك وحدك 07 متاع الصباح ايّا بالسلامة راسي وجعني

خرجت .. مشيت شوية و اطرشقت بالضحك اذيكة حدّ نيّتي عزوزة عندها الرعشة 70 سنة تنجّم تكحّلي بقلم الحمّير ...زدت  مشيت شوية.. و رجعتلها مدام قداش نجيب معايا؟

-  10    

- 10  ملاين ؟

- لا 10 الاف فرنك

ههه ظاهرلي لمرا ما خرجتش من قبل الاستقلال

نسيت لحكاية نركض غادي و هنا .. غدوة نشاء الله العرس بش نكذب عليهم بش نمشي للخلاء ة إلا لداري مفيها حدّ نمكيج لروحي و نلبس و السلام .

امّي تتجلط بابا يشكّ فياّ اخوتي يقولوا هبلت و خويا يهرّس راجلي بطريحة خاطر ما هوّنش عليّا حماتي تتنبز ويمكن ياسر متكمّلش العرس .. عالصباح سرّيت تعدّيت لمتاع الروبة و ديراكت تاكسي للحجامة العجيبة .. الحوينتة

مسكّرة 6:59 دق الباب متاع الدار تحلّ

- اياّ اتحرّك

- صباح الخير

- ايّا الكلام ياسر منحبّوش عاوني بالسكات

بدات وحدة وحدة .. الوقت السبعة متاع العشية حكمت ما نخزرش للمرايا كان كي نلبس الروبة  خزرت معرفتش روحي ما صدّقتش اللي ثمّة عبد فناّن في الوجوه و الشعورات كيفها صحت صحت من الفرحة و هي زادت قاتلي

نحبّ نقاّك اللي انا عندي 40 سنة ما شدّيتش بروس و سشوار نحلّ الحانوت و الكليونة اللي تجيني نطرّدها يعيطولي بالسرقة المهبولة  اما كيف شفتك حسيت ثمّة حاجة في وجهك  في صبرك غريبة قدّمت و انا خايفة لا

نخذلك في فرحة عمرك ايّا اعطيني 10 الاف متاعي ما طالبة منّك شيّ ربّي يهنّيك و يزيّن عليك اما اتفقدني و كان متتّ ادفنّي في الادريسة هاذي ..

كيف دخلت للصالة الناس الكلّ تسال عند شكون قدّت هوّنت بالقدا امّي قربتلي : تشكي و تبكي و معنديش و قدّت عند اشكون و اشكون و الطماق غدّدتني بواحد من الاسواق ..

تبسّمت .. لو كان تعرف .. شعيرة  لا الملقاط دخل في عيني ههه