انا و اعود بالله من كلمة انا عمرى ما نجمت نهار نكون انا حبسونى قيدونى سكتونى مخلونيش نهار نكون انا انا هيا انا و ديما موجودة معا هما اما هوما عمرهم ما فهموني و كيفكيف انا هوما في عالم وانا في عالم

نتلز سعات باش نكون كيفهم نقول اش مدخلني في سياسة و اقتصاد ما شاخين فاها كان لبنات الي تلقاهم لا علاقة بالحياة لا تسمع سياسة و لا دنيا شفاها من رداءة .. انا عمري ما كنت كيفهم و لا هوما نجموا يكونوا كيفي و لا انا باش نولي كيفهم

سمعت حزنت كرهت تأثرت صحت و بكيت ... انا نعرش نحكي علا روحى اما نعرف نحكى علي صاير لبلادي . انا هيا الي تمرمدت و صار فاها و سكتت و تحرشوا باها و سكتت و من وقتها كرهتهم و عافتهم و لعنتهم. انا هي الى امها قالتلها ا صبر فان الله مع الصابيرن وصلوا توة و يبركوا غدوة . انا الي فى بلادها ولاو ما يحكيو كان على العرا و شيوخ النكاح و ختان البنات و زواج المتعة و حور العين انا الى كانت صغيرة كانت بريئة لا تعرف لا تكدب لا تظلم ولات فى ها العالم مثل شيطان رجيم

حبيت اما عمري ما تحبييت عشقت اما عمرى ما تعشقت نوصل سعات معاش نفرق بين روحي و المراية... شكون انا انا الى قالولها لا متعملش هاكا و اعمل هاكا ووه يا بنتى تحب لعباد تتشمت فينا يزينا الى بوك عملوا فينا متكملش علينا .. انا انا فكرة ملقاتش ملجأ انا كلمة ملقاتش ورقة حوتة ملقاتش بحر

مازلوا يسؤلو فيا انا شكون بعد ما دمروني حطمونى و من كاس سم شربونى انا ما عندى ما نقول فى روحى اما هوما ديما عندهم ما يقولو فيا

سمعت باكا طفلة الى لاهية بروحها شوية

 لا لا شكونى

تي معرفتهاش توة الى شعرها قصير متلبس كان المعرى و المورى ديما وحدها و عمرنا مرينا صاحبها تقرا بعيد علينا فيبلها هكاكة باش تهرب من عينينا

 اى اى تفكرتها اما شعملت من عملة هل المرة المقصوفة ... البارح ريتها مروحة دنيا ليل شوية فبالها بروحها عزرى لا ام تلم لا بوا يصر بربي خلينى ساكته رانى منحبش نحكى عل لعباد ....

انا الى كدبوا علاها و قلولها دنيا باهية الناس باهية و الكرة الارضية راهى لونها وردية نساو ما قالوليش الي فما نسناسة كدابة بزناسة و لحاسة انا الي قالولها كان ماكش لابسة حجاب

فانك كافرة نحب نقولهم دينى بينى و بين اللى خلقنى بجاه ربى اعتقنى طرحة رهدانة و سكبانة ما رينا منهم كان رجعية و التخلف اى نعم انا هيا الى تسمع

Pink Floyd Nina و Nirvana...

اى اى انا هيا الى ليوما بدات تقرأ فى أصول الفلسفة الماركسية ....اما عمري ما نجمت نعرف الحقيقة الكائنة ورا كلمة انا

إيمان هميسي