المرة هذي غير كل مرَّة ..  المرة هذي موش كيما أي مرة تعدَّات حاولت انحلي فاها المرارة بالوهم ونطري بدموع عينيا قلبك المتحجر .. المرة هذي باش نذوقها كيما هي.. مرَّة ..  كيما ما ذُقْتش حتى مرة..  

مانيش باش نكذب وننسي.. ومانيش باش نغمض عيني عالتصويرة ونسكر وذني عالحقيقة ونتبع ببهامة.. حسي.. حسي اللي ياما خلاني نهتري وندادي.. حسي اللي منعني من اني نعيش كيما اندادي..  حسي اللي خلاني نمشي وراك كي المسحور..  تغلط وتزيد وتعاود وتبعد وتكبر وتتكبر ونبقى بيك في كل مرة مبهور..  

حسي اللي غلّطني برشا ولزني باش نجيك بساقيا باش تعطيني الكف بيديك ..  كف خلاني نكفر بالحب.. من بعد ما تعلمتو على يديك ..  أما تعرف.. ماهوش الكف اللي شواني ..  تصويرتك اللي خيابت برشا في عينيا .. وصوتك اللي كان في وذني سمفونية ..   كيفاه تقلب نشاز ؟ وعلاه كل ذكرى كانت معاك مُتعة تقلبت لدوامة عذاب في وسطها نعاني ؟ علاه بين ليلة ونهار خليتني نعشق روحي، ونحب كل تفصيل فيا ونتباهى بزيني قبل روحي.. تي شيهمني في روحي ؟ ما دامني حلوة في عينيك..  علاه نسيتني في كل حاجة خايبة ..  وطرت بيا الفوق وحسستني بحاجات موش كي الحاجات ..  وزرعت في قلبي ورود من قاع الخابية ..  وبعد نهارين خليتني  مرايتي كرهتني.. حتى لين وليت نستثقل نهز عيني فاها..  

موش هي تبسيمة عينيك اللي كنت شايفتني باها ؟  باش باش نشوفني تو تراه ؟ وقلبي اللي خليتو مفجوع قاعد تسمع في دقاتو .. قداش توجع !

وبحذا عينيا هوني تراه زيد ثبت .. أكا الوحش اللي رسملي تحويقة دايرة بغزرتي قاعد تراه ؟ الناس الكل تتشكى من مشيتي.. من غزرتي.. من قحرتي.. من تكشيرة عينيا والتنهيدة اللي ما تفارق جواجيّا ..  نقلهم مانيش حزينة .. ما بيا شي.. فرحانة موش ملاحظين ؟  

آه .. إي شوية تعب .. تي نسيت ما قلتلكمش.. ماني نستنى..  نستنى والتسنية هي اللي فهمتكم بالغالط ..  تاعبة صحيح أما ثبتوا مليح !  فرحانة خاطر اللي نستنى فيه باش يجي..  صحيح ما ريتوش عندي برشا .. وصحيح ما قاليش وقتاش باش يرجع ..  أما نتذكر صوتو مليح .. مشى .. مشى وقال باش يرجع .. ما نعرفش وقتاه ..  أما هاني نستنى ..  واللي يستنى خير م اللي يتمنى ..  اللي يستنى خير م اللي يتمنى ..  اللي يستنى خير م اللي يتمنى ..  

تي قلهم اللي أنا مانيش نتمنى ! تكلم ، تحرك ، أشرلي بيدك .. وقفني ف الشارع وانا نمشي ..قول " استنى " !

تي شباها الايامات تتعدى وتكذبني نهار بعد نهار ؟ شباهم الناس الكل ساخفين عليا م الصغار للكبار ؟  النهار الأول.. الثاني.. الثالث..  الجمعة الرابعة .. السادسة .. العاشرة ..  الشهر الأول .. الثاني .. الثالث ..  عديتهم وانا نرقد على آخر كلمات قلتهم ليا..  ونفيق على لقطة رسمتها في مخي وانتِ تقلي هاني رجعت ..

كنت عارف انك تستنى فيا ! اي صحيح ! استنيتك برشا .. أما مارجعتش ليا ..  والظاهر انك كنت.. تمني فيا ..  تي لحظة لحظة ..  

قصدي كنت ، نمني في روحي..  موش انتِ هو بيدو اللي الناس قالت عليه ما منوش أمل ؟

وانا كي المهبولة ندافع عليك تقول ملايكة على وجه الارض..  موش انتِ هو بيدو اللي حذرتني منو الناس الكل ؟

وقالتلي انو كلامك ما يصادقش فعلك لا بالطول لا بالعرض ..  وانا في كل مرة نخلقلك عذر م الحيط ..  

نشهق الشهقة في قلبي في كل مرة غيابك يكسرني وكذبك يجرحني  ولا عمري خرَّجت كلمة "أحيت" ..  ننزل على قلبي .. ونسكت .. ونرسم على وجهي تبسيمة كذابة ما تضحكش.. باش الناس ما تشمتش.. وما تقولش ياما نصحناك وما تسمعش ..

ما زلت مؤمنة بيك وبرجوعك .. ما زال عندي أمل ف القلب اللي ينبض بين ضلوعك ..  رغم انك ما غرست فيا كان الشك.. اللي ماخلالي حتى شي كامل في عينيا كذبتني برشا .. أما القلب اللي كذبتو ما ينجم كان يصدقك ..  

متأكدة م النهار اللي باش ترجع فيه والخد اللي من غيابك خذا الكف باش يجريلك ويعنقك ..  باش ترجع موش هكا ؟

 مُرَّة برشا لو كان تذوقها ..  كلمة "باش يرجع" كي تقولها ..  على حد تعرف ومتأكد ..  انو عايش حياتو ولا على بالو بسؤالك .. مهما تبكي.. مهما تتعذب.. مهما تشكي.. ومهما تتنهّد ..