الكتيبة وجيعة .. نار تكوي و تليع !

الكتيبة تخليك تعيش وجعك أكثر من مرة .. و في كل مرة تكتب فيها ، تحس روحك انسان غريب .. انسان ما تعرفوش . . ما تحبوش . . ما تقدروش . .

الكتيبة تخليك عريان قدام روحك . . تخليك تعرف حقيقة ذاتك ، بعد ما تطيح الماسكات و تتحل القلوب . .

ورقة و ستيلو و باكو دخان ! برشا كلام لازم يتقال . .

برشا فراغ لازم يتعبا . .

ماما تقلي ما نرضاش عليك لو كان نراك نهار تتكيف

الدخان للرجال . و انتي طفلة نظيفة

علاش اي حاجة نحبوها لازم يبعدونا عليها ؟

و لوقتاه الأم باش تبقى تخاف على صغارها و تتحكم في حياتهم ؟

أمي ما تعرفش اللي أنا كبرت .. ماعادش الطفلة الصغيرة اللي تبكي كيف ما تجيبش عدد باهي في الحساب . .

يقولو اللي أنا ذكية . . عندي معدل ممتاز و ديما ناخذ جايزة في آخر الثنية . .

أما الحقيقة . . نحس روحي بهيمة . . أحلامي بهيمة . . طموحاتي أكبر مني و موش عارفة لوين باش نوصل . .

أندادي عندهم برشا اختراعات . . وأنا ؟ ؟

أنا مازلت نخمم شكون جات الأولى .. الدجاجة و إلا العضمة ؟

نحط موزيكا انتي ستراس و نشطح . . ندور يمين ، ندور يسار حتى نتعب و نركح

. . تي شبينا ما نغنوش في الكيران ؟ ما نشطحوش في الكياسات ؟؟

الموزيكا نحطوها كان في العروسات . . وقت الناس تبدا تشطح و العروسة بغصتها بالعة السكات !!

في شوارعنا ، ما تلقى حتى واحد فرحان .. الوجوه مكشبرة تقول عليه يوم القيامة . .

تي لااا عاد ، ما نحبش الدنيا تفنا . . تي حتى نعرس و نجيب صغار . .

زعمة وحدة كيفي يجيها نهار و تعرس ؟

زعمة الجرح يبرا ؟ و الماضي يولي حكاية تضحك ؟

ساعة محلانا كنا مع بعضنا . .

كنت نرى روحي كيف نخزر في عينيك . . محلاني كنت و أنا يدي وسط يديك !!

تعرف موجوعة . . منك و بيك . .

موجوعة بذكرياتنا اللي موش حابة تفارقني لحظة . . و بكلامك آخر مرة حكينا فيها . .

موجوعة بحبك ليا و حبي ليك . . بعجزي على اني ننساك و نكمل عادي بلا بيك . .

كل حاجة فرحتني ، عشتها معاك و ضحكتني جات اليوم و بكتني ، حطمتني : قتلتني . .

انت نسيت و فيسع تبدلت . . أما أنا مستحيل ننسى . . كنت خويا . . كنت صديقي . . كنت تعنيلي برشا . . انت بين نهار وليلة تقلبت . . وأنا ؟

أنا عفست على قلبي وكملت . .

نجرب نحلم بعالم محلاه . . الدنيا ربيع و السماء زرقا و القلوب صافية . .

بوردة حمرة نلقاها قدام باب داري كيف الصباح نفيق . . و رسالة حب يكتبها تلميذ لمعلمة خلاتو يفيق . .

نحل عيني . . نلقى السماء معبيا صواريخ . .و الناس تحب تهد الحاجات اللي بنيت . .

نلقى حاجات موش مفهومة قدام داري . . عظمة مكسرة و ورقة مكتوب فيها اسمي و سائل يشبه للزيت . .

أمي قتلي سحر . .

أنا قلت ديجا مسحورة . .

مادام في وقت اللي ضحكو فيه أحبابي . .

أنا بكيت