منين بش نبدا و كيفاش بش نبدا!!

كيفاش بش نجم نكتب الي خبيتو سنين! كيفاش بش نفرغ قلبي و نشكي همي!

شكون الي بش يوسع بالو و يسمعني!

شكون الي بش ينصحني! شكون الي بش يمسحلي دموعي و يخبيني في حضنو م الدنيا الكل!

شكون بش يتكيني على صدرو و يلعبلي بشعري و يقلي ما تخافش هاني معاك ظالمة ولا مظلومة!!

شكون بش يواسيني كي نتوجع! شكون بش يداويني كي نتجرح!

شكون بش يقويني كي نضعف! شكون بش يصلحلي كي نغلط!

شكون بش يفرح بيا في عيد ميلادي و يدللني كايني بنية صغيرة!

شكون بش يهزني للبحر كي نفد و نتخنق و يقلي صيح وزعيط هوني ما يسمعك حد غيري!

شكون بش يدفيني كي نبرد! شكونزبش يضحكني كي نبكي! شكون بش يحزر عليا و يقلي انت ليا وحدي ملكي انا اكهو! شكون بش نشكيلو همي و غمي و ما يفدش مني!

شكون بش يرسم هاك البوسة الحنينة على خدي! شكون بش يغنيلي و يقلي نحبك!

شكون بش يخليني نحب الدنيا كي ينطق باسمي!

شكون عندي و شكون ليا و شكون بعدك بش يخمم فيا!!!

غريبة منسية لا ام حنينة تنشد عليا! لا بابا يعرف حالي و الي صاير فيا! لا اخت تونسني كي تضياق الدنيا عليا! و لا خو يسترني و يخاف عليا! زيد الدنيا كملت على ما بيا هزتلي الغالي الي منسيني احزاني! خلاتني بغصتي و تشمتت بيا!

الميمة ماتت و البابا نساني و الاخوة هربو عليا! و الغالي رحل هزو نعشو في نهار سبت عشية! ارقد و تهنا ان شاء الله مثواك الجنة! اما انا هاني وحدي نبكي وحدي نحزن وحدي نعيش وحدي لعل نرتاح و الموت يحن عليا!!