السخانة طلعت ... الجو برد ... الريح قسات... و العنقود مال الاوراق كيف الشجر ضايعة كاحلة صايعة

كيف الخريف و كيف الشمس الي ما ليها ونيس كيف الحلمة بخبارها تكسي المليان و تحرم للي معندوش الريش كالبة و هايمة و فاجرة يا دنيا عاهرة و حايرة و عاشقة كي المرا العريانة

كي ضو الصقيع كي الشمعة الذوابة و الخدود الصفرا و اليد الرجفانة لوين تميح تعطي بالحيط و تكنس تحت السقين دموع لوطا و السما  و تقلب عليك خيوط الهدرة و الحرقة و مرمة الروح ... 

تحاحي تناجي تصقصي ... تجفل كي صمبة الروس الى تحتها تنوس وتعطي ليلي عندو اللوز

حطيت القهوة على ركايب خاملة ناعسة جافلة كي فزاعة الموت و قلبت جنب الكاس نتأمل الرجوع ...

تميح تعطيك الريح

تميح تعطيك الحيط

تميح تعطيك العين

العين الخضرا و الزرقا و السودا العين الي كساتها الروح

العين الي باها الريح.. العين الي تثقب النار و تلم الاوهام و تسكب طريق النور

نور السماء و الوطا

نور العرجون كي خيط الذهب على مذهب الرمال

نور البذرة  و القلب الصافي كي جمرة الحب

نور الرب العالي الي ميهزو ميحة جبل

نور اليد الضاربة

نور اليد الصابرة

نوراليد الي لا عمرها متمد

اليد الي تعرف تحب

بقلم منيار بوغطاس