مإلي قلت واع في هالدنيا الفلوس في يدي عمري ما شديها ... تولدت في عيلة على قدها... دارنا يا دوب بيت في قلب بيت و شبه كوجينة و بيت راحة... جيت الثالث على زوز بنات... كبرت بقدرة ربي و بمجهود خواتي الخدامات... بطلو قرايتهم و خسرو عليا باش يقريوني...لكن بإلي نتقسطو فلوسنا ما تكفيش و كبرت و كبر مصروفي و فلوسهم يادوب يكفيوني ... الوالد الدوام لله و الموروث حكك سيراج و صبايغ و كرسي حديد ...

وليت في بلاصتو خدمة و في بلاصتي قراية ... خلطتي بالناس عطاتني معرفة و بارشا دراية... شفت ناس هازتها الدنيا على كسبانها شوية فلوس... ناس ما تعرفش تحن ما تعرفش تراعي الظروف و النفوس... ذلوني على قوت يومي و قهروني بتكبرهم المتصنع... نعتوني بلقب "الزوالي" و عايروني بيه كينو الذنب ذنبي...

يقارنو في لمعة صباطهم بصوابعي البردانة العريانة...

يضحكو على جنب كيف نبرر و نقول نقرى و نحب نولي حاجة باهية...

و بين هالناس "أيمن" يقرى معايا ... مإلي عرفتو عمرو ما كلمني و لا نهار كيف صحابي قعد باحذايا...

يشوف في روحو هدرة ...

غزرتو بالحقرة...

كلمتو ديما معايا بالنطرة...

كان حتى جاء يعرف يقرى...وين يلقى فرصة يضربني بالغدرة...

يسرقلي كتبي و يطيشهم في اعلى شجرة...

إسمي عمرو ما ناداني بيه ديما على لسانو "يا فقير ...يا زوالي... يا إلي ما في حالكش و ما عندكمش قدرة..."

عمري ما نسيت و لا باش ننسى كلماتو و اهاناتو ليا ...

صحيح قهروني و كانولي كالملح في عينيا... لكن شفت زادة في ثنية حياتي ناس أخرى بردت عليا التواضع من شيمهم ... عمرهم ما ياقفو قدامي بطولهم ديما صبابطهم في ساك ... و لسانهم حلو و وذنهم تسمع و تقيم... يحكيو معايا في كل خير ... ينصحوني و يعزروني كيف نقول العيب... يشجعوني و يشبعوني بالامل و دعاء الخير إلي ريحتو كيف الطيب. .. ناس طيبة تستاهل كان الخير...

عندي صاحب هو الخو الي طلعت بيه مالدنيا... ينحيها من فمو و يعطيهالي و ما يرضاش يشوف روحو خير مني ...

الوقت جرى و كبرنا... في قرايتي عمري ما سلمت... تعبت تمرمدت ... و في الآخر نجحت و تخرجت... في إدارة الأعمال وليت مهف... اليوم جاء وقت الخدمة الصحيحة باش التعب الي فات كلو يتخلف... في الحقيق و كالعادة بلاش معارف ما عمرك لا تخدم و لا تشد بلاصة... الحمد الله الناس الباهين وقفولي.. . راجل طيب و بلاصتو مرموقة ...عرفتو في خدمة الوالد الموروثة ...كنت ديما نشكيلو و نطلب نصايحو كل ما يجي نمسحلو صباطو... اليوم قالي إنت إلي نحطك تخدم في شركتي من غير ما نفكر بفم يضحك و عينين مغلوقة ... وافقت... موش قلتلكم الدنيا مازال فيها الخير ... موش قلتلكم عندي أمل في هالدنيا كبير... تعبت و خدمت ... بجدارتي و مجهوجي توفقت... الراجل زاد حبني كيف عرفني ... نهار قالي آنا ما عنديش أولاد كان بنتي و خاطر تربيتك و أخلاقك باش نعمل بأصلي.... إنت ماليوم في بلاصتي تشد ...آنا راجل كبير و من بعد هالأعوام إلي عرفتك فيهم ما نلقى في أمانتك و خدمتك حد... و كيما قال رسولنا الكريم في ما معناه أخطب الراجل الطيب و الثقة كان عندك ليه بنية... و عرسك ببنتي كانك موافق راهو شرف ليا ...

بعد منام عيني يا ولدي إنت سندها و إنت الولد الي باش تدعيلي بالخير و الرحمة معاها هي ...

الفرحة الي في بالي ودعتني من صغري طلعت تستنى في هالفرصة واقفة باحذايا... مإلي سمعت حديث هالراجل الطيب جات و وقفت معايا....

الحمد الله باش نعمل عيلة ... و باش نولي مدير أعمال و نتلهى كيف ما حبيت بمشاريع كبيرة...

تقام العرس و الأفراح.. الحمد لله دعاء الوالدة يرحمها جاني منو الرباح... الشركة ولات أكبر و المشروع ولى مشاريع... المرا عسل الدنيا بوها عطاني و ربحت... كان درتالسند و الهند ما نلقاش كيفها. الحمد الله خذيتها هي و رتحت...

خواتي ما نسيتهمش و حومتي القديمة مرشومة في القلب... صبايغ و كرسي الوالد في أحسن بلاصة في داري حاطتهم تحفة... صاحبي و خويا اليوم هو يدي اليمين... ما تتم حاجة الا ما نتحاورو و ما ندخلو خدامة و لا نخرجوهم ألا ما نتشاورو ...

نهار مسؤول معانا عندو قريبو قال متخرج ليه سنين و "زوالي"...

تعب و حفى و اليوم جاي قاصد ربي فيكم يتأمل في خدمة...

تفاهمنا على موعد من غدوة...

و آنا غاطس في حساباتي ...

دخل راجل ضعيف وجهو تاعب لشركتنا ....

دق باب البيرو و دخل...

كينو هازز حمل الدنيا على كرايمو و كيف شافني شهق و قريب يهبل...

آنا زادة ما كنتش أقل منو دهشة و تبسيمتي علات ...

عرفتوه شكون؟؟

----------------------

"زوالي" جاء يقابل في الزوالي...

و الدنيا دوارة...