الدنيا تبدلت ، الوقت تبدل .. جمل ديما نقولوهم باش نغطيوا الاغلاط الي نعملوهم و الا نبرروا فشلنا من حاجة مانجمناش نعملوها . ا

لزمان ما تبدلش احنا الي تبدلنا .. مش عارف علاش نلوموا ديما عالدنيا و الزمان ! الأيام ، الشهور ، السنين ماشين في اعمارنا تتبدل فقط كيف تتبدل التسميات من الطفولة للشباب للشيخوخة ،

مش الزمان يتطور احنا نقدموا و هو يتعدى على روحو .."فالزمن لا يملك الا المرور" ، الشمس تطلع كل يوم و تغرب كل يوم و معاها يتعدى النهار ورى النهار و تتكوم و تولي اشهر و سنين ..

عمركشي سمعت بنهار تطور وولا ثلاثين ساعة ؟ مستحيل ! احنا الي نتحايلوا و نقولوا مطولوا هالنهار !! والله النهار قصير تعدى .. و احنا الي نتحايل زادة و نقولوا السنة هذي سنة سعيدة ..

السنة هذي سنة حزينة .. الزمان بريء من سعادة و حزن العباد .. الدنيا تخلقت باش نعيشوا فيها مش باش نحاسبوها و نلوموا عليها على حساب اغلاطنا و الا احاسيس عشناها و اعمال فشلنا فيها .

احنا الوحيدين الي في ايدينا نكونوا فرحانين و الا تعيسين .. نفرحوا بدنيتنا و الا نبكيوا عليها .. ونفهموا الي احنا سكان هذا الزمن .. و احنا التعساء مش الزمن .