Soumaya Ben Rabià - سمية بن ربيع

يقول لأمو واختو جهنم بئس المصير ونقولو ربي يهديه...

يولي سيد مسيب في الدار ويلبس مرتو النقاب ويحرمها من ابسط حقوقها ويحبسها ويقلها ما تحلش الباب مهما يصير و نقولو ربي يهديه...

يحكم على اخوتو يقعدو، ياكلو، يشربو بالقفا وما يتلفتو الا ما يهبط على مرتو الغطا على خاترها عورة ما لازمهاش تترا ويزيد يفتي ويعطي تبرير ونقولو ربي يهديه...


ينادي بالجهاد في سوريا و يقرر بش يمشي يجاهد وكي تولد مرتو وتجيبلو الصغير يحبها تخلط عليه بدافع الشهادة والتحرير ونقولو ربي يهديه...

يمارس التكفير ويقتل التفكير ويڨمر في الناس تڨمير ونقولو ربي يهديه...

يعبي روحو بالبغض والحقد ويخرج يقتل بعد ما برمجوه ولقنوه تلقين ونقولو ربي يهديه...

يخرب الدنيا تخريب وكي تجي تحاسبو يسكتك ويكذبك تكذيب ونقولو ربي يهديه...

إنسانيتو في تحجير ويفجّر العباد تفجير وعمايلو ادمّر تدمير وهذا الكل باسم الدين...

اما للتذكير،الدين من هذا بعيد،الدين جاء للتنوير والتعمير

واذا تدينك خرجك من الانسانية وخلاك تظلم البشرية،راجع فهمك للدين على خاترو بريء من الظلم والظالمين...

يا انسان خلقك ربي صافي ونظيف،علاش تنساق وراء لعبة الشر وتحرف دينك تحريف!..خسارة قاعد تتحول من مسلم بالفطرة لكافر بالعمد والتدبير